Ricardo Kaka është rikthyer në Milano e të gjithë i janë “turrur” për të mësuar qëllimin e rikthimit në “shtëpi” të djalit të dashur të “familjes”.
Braziliani ka pasur disa takime me drejtuesit e Milanit, e me siguri që ka dëgjuar ndonjë ofertë interesante prej tyre, pavarësisht se nuk e tregon.
Ai ka ndjekur ndeshjen e së enjtes së Milanit kundër Austrisë së Vjenës dhe ka mbetur i impresionuar nga një lojtar në veçanti. “Milan ka një thesar në organikë, që më çmend fare. Është Andre Silva dhe klubi duhet të besojë tek ai. Unë do ta kisha futur të luante edhe tek Milani i kohës sime. Është shumë i ri dhe ka aftësi të jashtëzakonshme” – ka thënë Kaka, ndërkohë që Andre Silva shënoi 2 gola në fitoren 5-1 të Milanit.
Fjalë për t’u mbajtur mend se nuk i thotë një personazh dosido, por vetë Kaka, lojtari që aq shumë gëzoi zemrat e milanistëve, kur shkëlqente në fushë me kuq e zinjtë. Por fjalët e brazilianit janë edhe “këmbanë” për trajnerin Montela, që jo gjithmonë e përfshin sulmuesin 21vjeçar në formacionin bazë. /tesheshi.com/
