Kryeparlamentari Kadri Veseli. nga kulla e Isa Boletinit, ka ngacmuar Lëvizjen Vetëvendosje në pikën më të dobët të saj, metodat e luftës guerrile…me gur.
“As një gur që u ndërtua në këto kulla nuk mundet me u shkatërru. Janë munduar të tjerët me i shkatërru, s’ka me pasë mundësi askush me i shkatërru, ashtu edhe shtetin kemi me mbajt të fuqishëm. Edhe mos me i qu zoti shumë peshë me hedh gurë në shtetin e Kosovës. Ata njerëz që ngrenë dorë mbi shtetin e Kosovës, ata nuk e njohin sakrificën e të rënëve. Ata njerëz i kanë hezitimet ndaj sukseseve të Kosovës, ata njerëz nuk e donë të ardhmen e Kosovës, sepse e ardhmja e Kosovës do të ecën gradualisht. Kemi veç 9 vjet shtet dhe jemi duke ecur përpara. A kemi të meta? Kemi shumë. A duhet me u përmirësu? Duhet. Por assesi nuk duhet me shkatërru”, tha ai.
Veseli më tej tha shqiptarët nuk i kanë pasur punë kurrë më mirë se tash, dhe se shqiptarët do të bashkohen në Bashkimin Evropian
“Besa, baca Isë është baba i shtetit të Kosovës, kemi me u bashkuar në BE, këtë e dini të gjithë, këtë nuk ka kush që e ndalë”, tha Veseli.
Ai premtoi investime në kullën e Isa Boletinit, vitin tjetër, që ky vend krahas dimensionit historik, të marrë dhe vlera kulturore-historike.
Në këtë ceremoni foli edhe përfaqësuesi i familjes Boletini, Gazmend Boletini, i cili falenderoi kryeparlamentarin Veseli për respektimin e figurës së Isa Boletinit për çdo vit. /tesheshi.com/
