Krijimi i Gjykatës Speciale siç duket ka shkaktuar më shumë probleme për koalicionin e madh qeverisës më shumë se sa që është pritur. Edhe pse është paralajmëruar disa herë votimi i kësaj gjykate, kjo gjë ende nuk ka ndodhur, pasi që dy partitë e koalicionit kanë probleme të brendshme me disa nga deputetët që kanë shprehur hapur qëndrimin se nuk do ta votojnë këtë gjykatë.
Në lidhje me këtë çështje kryetari i Kuvendit të Kosovës, Kadri Veseli ka thënë se ‘Specialja’ mund të votohet këtë javë.
Ai ka thënë që projektligji momentalisht është tek qeveria e Kosovës, por që ka shtuar se në raste të rëndësishme siç është projektligji për gjykatën atëherë mundet që Kuvendi me urgjencë ta procedojë.
“Në fakt ende s’e kemi draftligjin. Në atë çka kemi biseduar me kryeministrin shumë shpejt do ta kemi projektligjin për dhomat e veçanta të speciales në seancë dhe do t’i votojmë së bashku me ndryshimet kushtetuese… Nuk mund ta definoj nëse do të jetë këtë javë në mbledhjen e kryesisë. Por mund të mbajmë mbledhje tjetër të kryesisë”, ka thënë ai.
Ai ka shprehur bindjen që do të ketë konsensus nacional kur bëhet fjalë për gjykatën. Sipas tij, nuk duhet frikësuar krijimit të kësaj gjykate dhe se projektligji i hartuar i BE-së, nuk e prek sovranitetin e Kosovës.
Kuvendi i Kosovës do të mblidhet të enjten më 18 qershor, ku në rend të ditës ka edhe interpelancën me ministrin e Punëve të Jashtme, Hashim Thaçi, lidhur me demarkacionin me Malin e Zi.
Në anën tjetër, disa deputetë të Kuvendit të Kosovës janë njoftuar me draft-ligjin e Gjykatës Speciale që e ka hartuar Rusia, për t’u votuar në Këshillin e Sigurimit të OKB-së, nëse Kosova dështon ta miratojë atë.
Deputetë që e kanë parë projektligjin kanë treguar për Top Channel se ai është shqyrtuar në Komitetin e Pestë për Financat në Kombet e Bashkuara, ku është shqyrtuar kostoja financiare, në rast se gjykata themelohet nga Organizata.
Sipas deputetëve kosovarë, ky draft përmban në shumë kapituj termin “gjenocid”, ndërsa i gjithë ligji rifuqizon UNMIK-un dhe Rezolutën 1244.
Gjithashtu, sipas projekligjit, kjo gjykatë nuk ka afat kohor të veprimit dhe do të mbyllej me një rezolutë të re të Këshillit të Sigurimit, ku Rusia ka të drejtën e vetos. /tesheshi.com/
