Një grua e panjohur është treguar e dhembshur me fëmijët sirianë rrugëve të Stambollit, por në fund ia ka lënë në dorë pronarit të restorantit faturën e bamirësisë së saj dhe është zhdukur pa lënë gjurmë.
Në Taksim, një vend i preferuar për të huajt në Stamboll, dhe ku denduria e njerëzve është e jashtëzakonshme, një numër fëmijësh sirianë rreth e rrotull, diku te 35 syresh, janë mbledhur dje rreth mbrëmjes nga një grua në dukje zemërmirë dhe janë ushqyer prej saj.
E “mira” grua ka porositur për ta donerë dhe dhallë në një restorant aty pranë, duke u mbushur barkun fëmijëve sirianë refugjatë, por mirësia e saj nuk ka shkuar gjer në fund.
Kur ka ardhur momenti i pagesës, mendjeholla u ka thënë kamerierëve se po shkonte në një pikë këmbimi valutor për t’i kthyer në lira eurot që posedonte. I zoti i lokalit ka pritur më kot me orë të tëra, pasi gruaja nuk është dukur më.
Fatura prej 275 lirash, apo 94 dollarësh, ka mbetur e papaguar, e bashkë me të është zhdukur dhe buzëqeshja e të zotit të restorantit.
Istiklal Caddesi, rruga më e populluar në Taksim, e rrethuar pa fund me restorante e dyqane, është vendi ku ndodhin më së shumti incidente të tilla, edhe pse e tërë zona është e mbikëqyrur imtësisht nga forcat policore, që janë pandërprerë të pranishme në zonë në numër të madh. /tesheshi.com/
