Është mbyllur siç ka nisur ndeshja kryesore e kampionatit italian të futbollit, ajo që u luajt mes Juventusit dhe Interit në Torino. Ndeshja ka qenë më tepër taktike dhe e luftuar sesa spektakolare, e megjithatë emocioni e ka shoqëruar atë përgjatë 90 minutave.
Juventus është përpjekur për të shënuar në disa raste me Khedirën, Asamoah e Higuain, por portieri zikaltër Handanoviç u tregua i saktë në çdo ndërhyrje, duke konfirmuar se është ndër më të mirët e Seria A.
Edhe Inter pati disa raste “më të ndrojtura”, me Perisiç e Brozoviç, por asnjëri prej tyre nuk e gjeti kuadratin e portës.
Pjesa më e madhe e ndeshjes u zhvillua në mesfushë, ku Pjaniç, Khedira e Matuidi luftuan përgjatë gjithë minutave, me Vecino, Borja Valero e Brozoviç.
Pikërisht për shkak të dueleve në mesfushë, Ikardi e Higuain nuk dolën në pozicione të favorshme, thuajse në asnjë rast.
Në fund barazim pa gola dhe Inter që mbetet 2 pikë më shumë se Juventus, por që mund të arrihet në renditje nga Napoli që luan të dielën. /tesheshi.com/
