Dijetari i spikatur islam është detyruar dje të ngrejë zërin kundër kanaleve televizive egjiptiane, duke deklaruar se ato po përzgjidhnin pjesë të fjalimeve të tij të shkuara dhe po i transmetonin si të reja. Ai i akuzoi televizionet që mbështesin regjimin e es-Sisit për shtrembërim të fjalëve të tij.
Një deklaratë pak a shumë e gjatë e zyrës së Jusuf Kardavit sqaronte thuajse me hollësi gjithë atë çka po ndodhte, të parë si një propagandë dashakeqe ndaj dijetarit me nxjerrjen e mesazheve të tij jashtë kontekstit.
Në deklaratë thuhej se, “Kanalet televizive që mbështesin regjimin e puçit ushtarak po transmetojnë pjesë të përzgjedhura të fjalës sime mbi ‘operacionet e flijimit’, duke u dhënë përshtypjen e gabuar shikuesve se unë po flas mbi situatën aktuale në Egjipt.”
Në deklaratë ka vend dhe për një pjesë të dijetarëve egjiptianë që janë vënë në krah të regjimit dhe nuk kursejnë as Kardavin, “Nuk është e habitshme t’i shohësh disa nga dijetarët që e mbështesin regjimin e përfshirë aktivisht në fushatën kundër Kardavit. Këta janë njerëz të cilët e kanë humbur tashmë besueshmërinë e tyre për shkak të mbështetjes ndaj padrejtësisë, të mbështetjes për një regjim jolegjitim.”
I gjithë debati i ndezuar ka të bëjë me pikëpamjen e Jusuf Kardavit mbi “operacionet e flijimit”, të shpjeguar diku në një libër prej tij. Kardavi kishte deklaruar më herët se “operacionet e flijimit” ishin të lejuara vetëm për palestinezët, për shkak të kushteve të tyre të jashtëzakonshme.
Të nxjerra prej kontekstit, fjalët e Kardavit janë përcjellë në median egjiptiane si “një dritë jeshile e dhënë prej Kardavit për sulme vetëvrasëse nga Vëllazëria Muslimane kundër regjimit.”
Kardavi e ka mohuar tërësisht këtë, duke u shprehur se ato fjalime qenë të një kohe shumë para puçit ushtarak në Egjipt që solli në pushtet es-Sisin. /tesheshi.com/
