“Kemi mbërritur në momente vendimtare. Komisioni nuk është më aktori protagonist i kësaj faze, por do të bëjmë gjithçka që kemi në dorë për të bashkëpunuar. Ajo që përjashtojmë është mospagimi i borxhit”,- ka thënë presidenti i Komisionit Europian, Jean Claude Juncker gjatë një takimi me kryeministrin grek Alexis Tsipras në Bruksel.
“Do të prezantojmë një zgjidhje të mundshme gjatë javëve në vijim”,- ka shtuar ai. Me mendimin e Juncker është pajtuar edhe presidenti i PE, Martin Schulz, i cili është shprehur: “Do të kalojmë keqkuptimet dhe keqinterpretimet në mënyrë që të përballojmë dhe zgjidhim sa më parë problemin me Greqinë”. Në vijim të fjalës së Schulz ka bërë me dije se është e nevojshme që qeveria greke të ndalojë kërkimin e dëmshpërblimit të dëmeve të luftës ndaj Gjermanisë. “Është e nevojshme që liderët e qeverisë greke të jenë të përgjegjshëm dhe të kenë të qartë idetë në lidhje me këtë argument”,- ka shtuar kreu i PE-së.
Kryeministri grek, nga ana e tij, është shprehur se vendi i tij “ka nisur të respektojë përgjegjësitë e marra pas mbledhjes së Eurogrupit më 20 shkurt. Ne po bëjmë pjesën tonë dhe presim që edhe ju të bëni pjesën tuaj”.
Në përfundim të takimit me Schulz, kryeministri i Greqisë është shprehur optimist që në fund do të gjendet një zgjidhje për problemet e Greqisë me Bashkimin Europian.
“Jemi pro Europës dhe duam të vijojmë bashkë përpara. Jam i sigurt se në fund do të zgjidhim të gjitha keqkuptimet dhe do të ecim përpara me aktualizimin e vendimeve të marra më 20 shkurt në mbledhjen e Eurogrupit”,- është shprehur Tsipras.
Ai ka deklaruar se Greqia ka vullnetin politik për të gjetur një zgjidhje për problemet e përbashkëta dhe “me vullnet, gjithçka arrihet”./tesheshi.com/
