Kompleksi i xhamisë el-Aksa në Jerusalem do të mbikëqyret këtej e tutje me kamera sigurie. Kështu kanë lajmëruar të dielën autoritetet jordaneze, që kanë dhe kujdestarinë mbi xhaminë.
Siç ka njoftuar ministri jordanez i Çështjeve Islame, do të ngrihet dhe një qendër kontrolli, për të patur një mbikëqyrje të pandërprerë të të gjithë mjedisit. Pamjet do të përcillen aty për aty, “për të dokumentuar çdo shkelje dhe agresion izraelit”, por nuk do të ketë kamera brenda ambienteve të xhamisë.
Ministri amerikan i Shtetit, John Kerry, e pati përkrahur në tetorin e shkuar një iniciativë të tillë pas bisedimeve me mbretin Abdullah të Jordanisë.
Që shtatorin e shkuar ka patur përplasje të vazhdueshme mes palestinezëve dhe forcave izraelite të sigurisë, të nxitura nga zërat për ndryshim të rregullave të administrimit të kompleksit. 198 palestinezë kanë humbur jetën që asokohe.
Jordania ka të drejtat e kujdestarisë mbi kompleksin e xhamis el-Aksa, ndërsa Izraeli kontrollon hyrjen në të.
Një pjesë e palestinezëve janë shprehur kundër vendosjes së kamerave të sigurisë. Kemal Hatibi, zëvendëskryetari i Lëvizjes Islame Palestineze, e ka quajtur vendosjen e kamerave, pamjet e të cilave do t’u përcillen si jordanezëve dhe izraelitëve, si një mënyrë për për të përforcuar sovranitetin e Izraelit mbi kompleksin.
“E hedhim poshtë këtë plotësisht. Izraeli e ka arritur tashmë atë çka ka dashur. Ai mund të vëzhgojë gjithçka që lëviz, e mund të arrestojë çdokënd.”
Xhamia el-Aksa është një burim i vazhdueshëm tensioni mes izraelitëve dhe palestinezëve, për shkak të pozicionit dhe historisë së saj. /tesheshi.com/
