Sekretari amerikan i Shtetit, John Kerry, zhvilloi dje bisedime me udhëheqësit grekë dhe turq të ishullit të ndarë. Tejet optimist, ai e përshkroi si të mundshëm një ribashkim të Qipros.
Ai e çmoi fort përparimin e dukshëm në bisedimet mes dy palëve, për të deklaruar shpresëplotë: “Unë jam i bindur se mund të arrihet një marrëveshje. Një Qipro e bashkuar mund të qëndrojë si një pishtar për paqen në një rajon të trazuar të botës.”
Kerry ka vënë në pah rëndësinë që ai dhe presidenti Obama i kanë kushtuar zgjidhjes së çështjes së Qipros, “Ka qenë një përparësi për mua dhe presidentin Obama.” Prej tij nuk kanë munguar dhe fjalët e mira për udhëheqësit e dy pjesëve të ndara të Qipros, “Më kanë lënë mbresa si Nikosi dhe Mustafai. Fokusi ynë duhet të jetë në atë që mund të ndryshojmë. Sot e kam parë këtë dëshirë.”
Vizita e sekretarit amerikan të Shtetit u krye vetëm një javë pasi i dërguari i OKB-së, Espen Barth Eide, deklaroi për “përparim të mëtejshëm” në bisedimet.
Shpresat për një zgjidhje të çështjes qipriote morën jetë në maj të këtij viti, kur rinisën negociatat mes dy udhëheqësve, posaçërisht pas fitores në zgjedhjet elektorale të Mustafa Akënxhës në pjesën turke. Të njëjtën gatishmëri për zgjidhje ka treguar dhe Nikos Anastasiadis, udhëheqësi i pjesës greke.
Qiproja do të ndahej në vitin 1974, dhe në 1983-shin Qiproja Veriore do të deklaronte pavarësinë. /tesheshi.com/
