Sekretari amerikan i Shtetit, John Kerry, ka drejtuar një mesazh publik në lidhje me ditën e rrëzimit të komunizmin, por këtë mesazh nuk ia ka dërguar as qeverisë dhe as klasës politike, por qytetarëve.
“Në emër të presidentit Obama dhe popullit amerikan, ju bëj urimet më të sinqerta për të gjithë shqiptarët, në Ditën Kombëtare të Rinisë, në 25-vjetorin e lëvizjes studentore që çoi në rrëzimin e komunizmit më 8 dhjetor të vitit 1990. Ky tranzicion historik, është mbeshtetur nga udhëheqësit e lëvizjes studentore, është përforcuar nga qytetarët që marshuan dhe demonstruan kundër diktaturës dhe është ndihmuar nga ish-anëtarët e guximshëm të partisë, të cilët ndihmuan në vendosjen e sundimit popullor.
Me këtë rast, ne njohim përparimet e mëdha që Shqipëria ka bërë në këtë çerek shekulli. Sot, Shqipëria është një aleat i NATO-s dhe kontribues për paqen dhe sigurinë ndërkombëtare. Shqipëria, është në rrugën drejt integrimit të plotë euro-atlantik, duke bërë reformat e nevojshme për të forcuar institucionet e saj demokratike dhe per të zhvilluar një ekonomi konkurruese të tregut të lirë. Shtetet e Bashkuara vlerësojne miqësinë e ngrohtë me qeverinë dhe popullin shqiptar dhe shikojnë në të ardhmen thellimin e këtij partneriteti”, thekson në mesazhin e tij shefi i diplomacisë së SHBA-së.
/tesheshi.com/
