Të gjithë e dimë se femrat shtatzënë kanë nevojë për një përkujdesje ndryshe nga herët e tjera, kur ato janë në gjendje normale. Ato duan vëmendje dhe të mos i lësh asnjëherë vetëm. Për të mos folur pastaj për ushqimin që e duan tërësisht të zgjedhur si dhe vitaminat e veçanta.
Por a e dini se cili është shoqëruesi më i mirë për to? “Miku” më i mirë për femrat që janë në pritje të një fëmije, është vitamina B9, e njohur ndryshe si acidi folik.
Kështu tha studiuesi italian i Centro Nazionale Malattie Rare dell’Istituto Superiore di Sanità (ISS), Paolo Salerno, në një aktivitet të mbajtur nga Ministria e Shëndetësisë, lidhur me ushqyerjen e shëndetshme gjatë shtatzënisë.
“Gjithë femrat që planifikojnë një shtatzëni duhet të nisin marrjen e acidit folik rregullisht në masën 0.4 miligramë në ditë. Këshillohet që të merret deri në muajin e tretë të shtatzënisë, kur ndodh mbyllja e tubit neural. Vitamina B9 parandalon zhvillimin te fëmija të keqformimeve në sistemin nervor qendror”, shprehet Salerno.
Ai thotë më tej se acidi folik gjendet në fruta dhe sallatat me fletë të gjerë. Marrja e këtij acidi, duhet bërë në mungesë totale të alkoolit dhe duhanit./tesheshi.com/
