Nga Mensur Krasniqi
Sapo të përmendet libri, shqiptarve në Shkupit u shkon mendja, e bashkë me të dhe goja, direkt tek librari “Rilindja” në Çarshinë e vjetër, e cila daton që nga koha e ish-Jugosllavisë si një filial i qendrës botuese të librave në Prishtinë.
Sot e 23 vite kjo librari është nën pronësinë e familjes Jonuzi. Kjo familje ka arritur të ruajë emrin dhe traditën shumëvjeçare të “Rilindjes” asokohëshe. Dyqani ku ndodhet libraria ka një pamje autentike, me rafte prej kornizave të drurit dhe e stërmbushur me libra, doracake dhe tekste tjera shkollore në gjuhën shqipe.
Për portalin tesheshi.com, studenti 23-vjeçar i familjes Jonuzi, Fuad Jonuzi ka sqaruar mbi themelimin e “Rilindjes” dhe emërtimin e saj.
“Sa i përket librarisë Rilindja ajo daton prej vitit 1992, që i bie të ketë 23 vite që egziston dhe vepron nga familja jonë. Realisht “Rilindja” është një rezultat i një pune të madhe të paraardhësve tanë. Këtë veprimtari e kemi emërtuar “Rilindja” për shkak se ërtet gjëja më e fuqishme e një shoqërie është lapsi, libri dhe dituria dhe se personat të cilët kanë “humbur” veten, ato me kthim tek dituria e gjejnë veten ose thjesht rilindin në një far mënyre”, shprehet Fuad Jonuzi.
Sekreti i një pune të suksesshme dhe një shërbimi të një niveli të mirë sipas Jonuzit qëndron tek sinqeriteti, vullneti i mirëfilltë, korrektësia si dhe puna e pakursyer që kanë bërë këto vite me rrallë. Ai shpreson që të vazhdojnë së ushtruari me veprimtarinë e tyre duke qenë në shërbim të shoqërisë si dhe në ngritjen e vetëdijes dhe leximit.
“Kuptohet që nuk është e lehtë të jesh 23 vite në treg duke pasur parasysh faktorë të ndryshëm që ndikojnë qofte në rritjen apo zvogëlimin e shitjes. Mirëpo duke iu faleminderuar Zotit deri më tani jemi këtu ku jem.
Si shumë librari tjera edhe “Rilindja” në Shkup, goditjen më të rëndë e ka marrë disa vite me parë kur qeveria solli vendim që furnizimi i nxënësve me libra të bëhet nëpërmjet Ministrisë së Arsimit.
Gjithashtu edhe rritja e papunësisë, sipas Jonuzit, është prej faktorëve për gjendjen e sotme të librarive në tërësi.
“Kohët e fundit kemi rënie të madhe të leximit që e them me keqardhje gjë që reflekton në rënien e shitjes, mirëpo çdoherë shpresojmë dhe do të tentojmë me mundësitë tona të jemi afër të gjithë atyre që janë ithtare të dijes”, përfundoi Jonuzi. /tesheshi.com/
