Dalibor Jevtiç nga Lista Serbe u emërua sot në pozitën e Ministrit për Komunitete dhe Kthim.
Atë e emëroi Kryeministri i Republikës së Kosovës, Isa Mustafa pasi Lista Serbe ka njoftuar Kryeministrin se do të kthehet aktivisht në Parlament dhe në Qeveri nga data 27 prill 2015.
Kryeministri Isa Mustafa dje ka pritur në zyrën e tij edhe katër kryetarët e komunave të veriut të Kosovës me shumicë serbe, Leposaviçit, Zubin Potokut, Zveçanit dhe Mitrovicës Veriore, ku janë harmonizuar qëndrimet që këto komuna të miratojnë buxhetet e tyre, në përputhje me ligjet e Kosovës.
Ky zhvillim vjen pas raundit 25 të dialogut në nivel të lartë kryeministror Kosovë-Serbi, në 21 prill në Bruksel, ku pas takimit të “Western Balkans’ 6”, përfaqësuesja e lartë e BE-së për Punë të Jashtme dhe Politika të Sigurisë, Federica Mogherini, kishte ftuar në takim kryeministrin kosovar Isa Mustafa dhe kryeministrin serb Aleksandar Vuçiç.
Përfaqësuesit e Listës Serbe në Kuvend dhe në Qeverinë e Kosovës bojkotonin tashmë në muajin e tretë, prej 3 shkurtit, kur kryeministri kosovar Isa Mustafa shkarkoi ministrin serb për Komunitete dhe Kthim, Aleksandar Jablanoviç, pasi deklarata e tij ku protestueset në Gjakovë, familjare të personave të zhdukur gjatë luftës, i kishte quajtur “egërsira” shkaktoi shumë reagime dhe protesta, madje edhe të dhunëshme.
