Konsullata amerikane në Jerusalem, e cila është e destinuar për palestinezët, tani është pjesë e ambasadës së re të SHBA në Izrael, e vendosur në të njëjtin qytet, tha Departamenti i Shtetit.
Udhëheqja palestineze reagoi me zemërim ndaj vendimit, duke vlerësuar se administrata amerikane tregon kështu më pak vëmendje ndaj qëndrimit të tyre mbi statusin e Jerusalemit, raporton Reuters.
Vendimin për krijimin e një misioni të përbashkët diplomatik të Izraelit dhe palestinezëve, e njoftoi Sekretari i Shtetit Mike Pompeo në tetor të vitit të kaluar për t’u zbatuar tani në mars.
Presidenti Donald Trump ka provokuar zemërim në botën arabe, kur në dhjetor 2017 ai e njohu Jerusalemin si kryeqytetin e Izraelit dhe e dërgoi ambasadën atje në maj të vitit të kaluar.
Pas kësaj, udhëheqësit palestinezë pezulluan kontaktet diplomatike me Uashingtonin dhe bojkotuan përpjekjet e SHBA-së për të arritur një plan paqeje. /tesheshi.com/
