Jemeni është në prag të luftës civile, ka deklaruar i dërguari i Kombeve të Bashkuara.
Jamal Benomar paralajmëroi Këshillin e Sigurimit të OKB-së se konflikti në Jemen mund të marrë ngjyrat e konflikteve në Irak, Siri apo Libi.
Ngjarjet në Jemen po e shtyjnë vendin në zgrip të një lufte civile, është shprehur i dërguari i posaçëm i Kombeve të Bashkuara, duke u bërë thirrje palëve ta zgjidhin në mënyrë paqësore konfliktin në përshkallëzim, ndërsa bisedimet e paqes kanë ngecur.
Fjalët e tij përcollën tension dhe shqetësim të dukshëm, teksa ai bëri të njohur në një takim jashtë radhe të Këshillit të Sigurimit se vendi do të rrëshqasë gjithnjë e më tepër në dhunë nëse nuk ndërmerren hapa të menjëhershme.
“Në përfundim,” tha Jamal Benomar, “i nxis të gjitha palët, me gjithë tensionet në rritje, ta vlerësojnë seriozitetin e situatës dhe ta çtendosin duke u dhënë fund armiqësive, duke qëndruar lag provokimeve dhe përdorimit të dhunës.”
Vendi arab është përfshirë muajt e fundit nga kaosi, ndërsa milicia shiite, e njohur si husinjtë, mori kontrollin e kryeqytetit, Sanës, dhe e detyroi presidentin Abdrabbu Mansur Hadi të largohej për në Aden, në qytetin kryesor në jug të vendit. /tesheshi.com/
