Përballje ndërmjet shqiptarëve, futbollistë që luajnë 90 minuta, disa e shohin ndeshjen nga stoli, ndërkohë disa të tjerë nuk grumbullohen fare. Kjo është gjendja e futbollistëve shqiptarë në Europë. Paraqitjet e mira nuk kanë munguar, por golin nuk e shënjestroi asnjëri nga futbollistët e kombëtares shqiptare, duke vazhduar kështu “agjërimin” e javës së shkuar.
Nga një hero për skuadrën e tij, Etrit Berisha është rikthyer sërish në stol më skuadrën e tij Lazio. Gardiani i portës kuq e zi, kishte pritur një penalti në mesjavë në kuadër të Ligës së Europës, ndërkohë takimin e kësaj jave në kampionatin italian ndaj Torinos e ndoqi nga bankina e rezervave.
Lorik Cana ka qenë një mur për skuadrën e tij Nantes në sfidën e së premtes ndaj Caen. Kapiteni i shqiponjave pati paraqitje të mirë dhe i ndihmoi repartit të mbrojtjes të mbajnë portën të paprekur. Ndërkohë, në fushën e lojës dhjetë minuta para fundit u hodh edhe Ermir Lenjani duke patur fare pak kontakt me topin.
Elseid Hysaj pati një transfertë të vështirë ndaj Chievo Veronas, por me mjaft sukses, skuadra e tij Napoli e tejkaloi duke regjistruar fitoren e rradhës. Hysaj pati paraqitje solide për 90 minuta të luajtura.
Berat Xhimshiti me skuadrën e tij Zurich, nuk u paraqit asnjë minutë në duel me St.Gallen. Ndeshjen nga stoli e ndoqi edhe Naser Aliji me Baselin që në shtëpi triumfoi në derbin e javës ndaj skuadrës Young Boys. Në këtë ndeshje, Taulant Xhaka ishte shqiptari i vetëm që u paraqit në këtë supersfidë, pasi edhe Shkëlzen Gashi nuk luajti fare. Në fakt sulmuesi i kombëtares shqiptare nuk ishte grumbulluar fare për këtë përballje.
Në Turqi ka pasur pak minuta ku në fushën e lojës ka pasur një derbi shqiptarësh. Basaksehir-Koniaspor është fituar nga skuadra e Sokol Cikalleshit, për të cilin ka pasur pak minuta në fund për të dubluar me mesfushorin Alban Meha, që ka dalë i mundur me katër gola nga fusha e lojës.
Në Kroaci, Odise Roshi është inkuadruar në minutën e 65-të, me skuadrën e tij Rijeka që këtë vikend ndali liderin Dinamo Zagreb, (2:1). Ndeshjen nga stoli i rezervave e ndoqi Bekim Balaj. /tesheshi.com/
