Nga Blendi Gashi
Do mbahet mend gjatë “qen”-i që Ramush Haradinaj ia adresoi dje kryeministrit Isa Mustafa. Ky “qen” do futet në analet e kujtesës së opinionit publik, për të ridalë nga kolibja sa herë do e kërkojë puna, sidomos ndonjë ditë kur realpolitika ti sjellë afër e afër të dy, siç i solli dhe Isën me Hashimin, të përbëtuar që nuk do mund të ishin kurrë bashkë.
“Qen”-i ishte një ndodhi gojore që u konsumua në hyrje të Kuvendit të Kosovës, teksa kreu i AAK-së u ndalua nga sigurimi në momentin kur shkoi të dorëzonte firmat e mbledhura kundër Zajednicës. Një anëtar i personelit të sigurimit të Kuvendit tha se kishte marrë urdhër për të mos lejuar hyrjen e deputetëve në objekt, gjë që ka irrituar tej mase Haradinajt, i cili shfryu më pas: “Kush e ka thënë thanë atë mendim le të këshillohet me Hashimin, Kadrinë ia me Isë qenin”.
Më pas, Haradinaj u arsyetua.“Unë gjithmonë kam respektuar Kuvendin dhe procedurat e tij, edhe në të kaluarën, edhe tani, por edhe në të ardhmen do të veproj njëlloj. Sot kam shprehur pakënaqësinë time të thellë dhe kundërshtimin tim, që të pengohet futja në Kuvend të Peticionit ku kanë nënshkruar mbi 200 mijë qytetarë e votues të Kosovës. Askush nuk ka të drejtë ta pengojë zërin qytetar që të hyjë dhe të dëgjohet në Kuvend. Ata që provojnë ta pengojnë një gjë të tillë, nuk kanë asgjë të përbashkët me demokracinë e as me jetën parlamentare. Unë jam i zgjedhur i popullit dhe gjithmonë do ta mbrojë zërin e tij.”
Reagon këshilltari i Veselit, Blerim Latifi
Pas këtij moment, ka reaguar kabineti i kryekuvendarit Kadri Veseli.
Blerim Latifi, këshilltar, përmes një deklarate ka thënë se hyrja me forcë në ambientet e Kuvendit të Kosovës duke mos përfillur dhe penguar fizikisht stafin e sigurimit të Kuvendit është cënimi tjetër që opozita ua ka bërë ligjeve të Kosovës.
“Deputetit të Kuvendit të Kosovës i lejohet qasja në Kuvend në çdo kohë, por duke respektuar ligjet dhe rregulloret e Kuvendit. Sjellja arbitrare është në kundërshtim të plotë me frymën e parlamentarizmit dhe demokracisë kushtetuese”.
Opozita:Kadri Veseli nuk na do brenda Kuvendit
Tre liderët e partive opozitare thonë se Kadri Veseli ka marrë vendim t’i ndalonte konferencat e opozitës brenda hapësirave të Parlamentit dhe që të mos lejohet futja në Kuvend e dokumenteve që përmbanin mbi 200,000 nënshkrimet e qytetarëve kundër “Zajednicës” dhe demarkacionit me Malin e Zi”.
“Megjithatë, drejtuesit e subjekteve opozitare, nuk u ndalën para urdhrave të Veselit dhe u futën brenda pa lejen e sigurimit dhe po ashtu i futën brenda edhe nënshkrimet e qytetarëve. Konferenca u mbajt pa lejen e Veselit dhe aty u prezantuan ato nënshkrime para medieve. Kadri Veseli nuk e do opozitën brenda Kuvendit. Kadri Veseli nuk i do as nënshkrimet e qytetarëve që shprehën pakënaqësinë e tyre me marrëveshjet me Serbinë dhe demarkacionin me Malin e Zi. Opozita dhe peticioni i qytetarëve i pengojnë Kadri Veselit sepse ia kujtojnë atij se sa në shpërputhje janë vendimet e këtij pushteti me vullnetin e qytetarëve. Por, Kadri Veseli është i pafuqishëm përballë këtij vullneti”, thuhet në deklaratën e opozitës.
Plasin reagime të shumta
Kanë ardhur reagime të shumta pas vendimit që deputetëve të mos u lejohet hyrja në institucionin ligjvënës, por dhe ndaj fjalorit fyes të Haradinajt në drejtim të sigurimit.
Kryetari i Prishtinës, Shpend Ahmeti njëherit anëtar i “Vetëvendosjes”, përmes një postimi në Facebook e ka cilësuar si shkelje të Kushtetutës vendimin që deputetëve të mos u lejohet hyrja në Kuvend.
“Me tentu me ja ndalu deputetit me hy në Kuvend është shkelje e Kushtetutës, neni 11. Lere në atë ndërtesë, po deputeti ka të drejtë të hyjë në çdo ndërtesë të institucioneve të Republikës së Kosovës pa pengesë sepse është sovran. Ky vendim veçse i ka vendosë në vështirësi punëtorët e sigurimit që duhej ta shkelnin kushtetutën. Me u fsheh skutave e me i shti punëtorët me e shkel kushtetutën e me shkaktu incidente nuk i bën nder askujt”, ka shkruar Ahmeti në Facebook.
Gazetari Adriatik Kelmendi, përmes një shkrimi në Facebook thotë se mbyllja e derës së Kuvendit për deputetët hap derën e rrugës, ndërsa shprehet se edhe Haradinaj duhet t’i kërkoi falje punëtorit të sigurimit.
“Mustafa, Veseli dhe Thaçi duhet të reflektojnë shumë seriozisht për skandalin e sotëm dhe jo vetëm të sotëm. Është dyfytyrësi që në njërën anë t’i bëjnë ftesë opozitës të kthehet në Kuvend për t’i qartësuar mosmarrëveshjet e në anën tjetër të tentojnë t’ia mbyllin derën po kësaj opozite kur vjen në Kuvend. Ymeri, Haradinaj e Limaj janë përfaqësuesit që kanë marrë votat e popullit pikërisht për ta përfaqësuar atë pjesë të popullit në Kuvend. Mbyllja e derës së Kuvendit është hapje e derës së rrugës! Mbyllja e derës së Kuvendit është edhe hapje e derës anarkisë – ku ashpërsimi i gjuhës parë sot është e keqja më e vogël krahasuar me ato që mund të pasojnë. Veseli, Mustafa e Thaçi sot do duhej kërkuar falje për këtë gafë kolegëve të tyre opozitarë. Haradinaj do duhej t’u kërkonte falje nëpunësve të sigurimit të Kuvendit, të cilët aty janë për të marrë një rrogë, sipas detyrave që iu jepen dhe asgjë më shumë“, ka shkruar Kelmendi.
Versioni i policisë pas incidentit në Kuvend
Policia e Kosovës, thotë se zyrtarët kompetentë policorë kanë ndërmarrë veprimet e nevojshme për të menaxhuar tërë këtë situatë të pavolitshme konform rrethanave të shfaqura, ku të përfshirë ishin edhe liderët e tri subjekteve politike.
“Nga hyrja për deputetë në Kuvend kanë hyrë tre liderët e partive opozitare dhe sipas procedurave të kontrollit janë lejuar pa ndonjë problem të hyjnë brenda. Ndërkohë kanë ardhur edhe personat tjerë në cilësi të vozitësve dhe asistentëve të tre liderëve opozitarë, të cilët kanë sjell disa folderë, me mbishkrimin peticion dhe pasi kaluan përmes skanerit zyrtarët kompetentë ndërmorën masat e nevojshme për kontrollim dhe verifikim sipas rregullave. I menjëhershëm ka qenë reagimi i tre liderëve opozitarë të cilët nga ambienti i brendshëm i Kuvendit u kthyen te recepcioni dhe ndaj zyrtarëve kompetentë në kryerje të detyrave ligjore filluan përpjekjet për të arsyetuar futjen e folderëve në Kuvend, pastaj me ashpërsi kanë kapur folderët, gjithashtu duke fyer dhe duke u përballur e shtyrë me zyrtarët policorë arrijnë të futen brenda dhe drejtohen drejt hollit të Kuvendit.
Shkaku i kompleksitetit të kësaj ngjarjeje në ambientet e Kuvendit të RKS-së, Policia e Kosovës ka filluar hetimet preliminare për identifikimin e çfarëdo lëshimi eventual gjatë angazhimit të zyrtarëve policorë në ofrimin e sigurimit dhe kontrollit në Kuvend gjatë ditës së sotme”, thuhet në kumtesën e policisë.
/tesheshi.com/
