Kreu i Partisë Demokratike, Lulzim Basha, ka pritur sot në një takim anëtarët e misionit të FMN-së që prej ditësh ndodhet në Tiranë. Ata kanë dashur të informohen nga përfaqsuesi më i lartë i opozitës mbi mënyrën se si ajo mendonte ta frenonte borxhin publik nëse do i besohej qeverisja.
Por Basha është përqëndruar më tepër tek denoncimi i qeverisë, duke thënë se “vetëm dy vite niveli i borxhi është rritur nga 61% në 72% të PBB në një kohë që qeveria ka mashtruar lidhur me të ashtuquajturat borxhe për fatura të pashlyera. Në më shumë se dy vite nuk kemi pothuaj asnjë investim publik në një kohë që shpenzimet kapitale janë në rangun e rreth 600 milionë dollarëve në vit, por me të cilat deri më sot realizohen vetëm shëtitore me palma, shatërvanë dhe asnjë km rrugë, asnjë shkollë ose spital, asnjë kanal vaditës e kullues”.
Sipas Bashës, qeveria ka gënjyer dhe për borxhin e trashëguar nga qeverisja e mëparshme, ajo ku ai qenë ministër në disa dikastere. Ai i ka thënë misionit të FMN-së se nga kjo qeverisje po përfitojnë vetëm një grusht oligarkësh afër kryeministrit Rama, dhe se vendi po shkon drejt greminës ekonomike. /tesheshi.com/
