Nga Bashkim Kastrati
Shqiptarët që jetojnë në katër komunat në veri të Kosovës janë të diskriminuar nga udhëheqësit e këtyre komunave që udhëhiqen nga serbët dhe të lënë “jetim” nga institucionet qeveritare qendrore. Ndonëse përbëjnë më shumë se 35 për qind të popullatës në këto komuna, shqiptarët e kanë të pamundur të gjejnë një vend pune. Shqiptarët që jetojnë në veri nuk e kanë asnjë shans që të punësohen jo vetëm në administratën komunale, por as nëpër spitale, ambulanca, arsim apo edhe qendra sociale.
Pra shqiptarët në këtë pjesë të vendit nuk kanë pothuajse asnjë të drejtë, ndërsa kjo nuk mund të thuhet për serbët që jetojnë në pjesë tjera të Kosovës, të cilët nuk përballen me një diskriminim të tillë, gjithashtu edhe presioni ndërkombëtar tek shqiptarët për t’i përfshirë ata në institucione shtetërore është i madh.
Për shkak të diskriminimeve të tilla, këshilltarët komunal shqiptarë nuk e kanë votuar buxhetin e propozuar nga kryetari i Komunës së Mitrovicës së Veriut. Por pavarësisht këtij kundërshtimi, buxheti ka kaluar pasi që shumicën në Kuvendin Komunal atje e kanë serbët me 13 këshilltarë komunal, shqiptarët kanë pesë, ndërsa boshnjakët vetëm një.
Emir Azemi, këshilltar komunal në Komunën e Mitrovicës së Veriut ka thënë për tesheshi.com se nuk e kanë votuar buxhetin për shkak se ky buxhet nuk ka përfshirë asnjë nga interesat dhe kërkesat e qytetarëve shqiptarë dhe joserbë të asaj ane.
“Buxheti si i tillë që ka ardhur në kuvend ka qenë dhe është i papranueshëm për komunitetin shqiptar që jeton në Komunën e Mitrovicës veriore. Ky buxhet nuk i përmban kërkesat tona dhe të qytetarëve të tjerë jo serbë pa dallim etnie. Të gjithë ata që punojnë nëpër institucionet komunale dhe shtetërore janë serbë si p.sh te zjarrfikësit, qendra për punë sociale, shëndetësia arsimi. Edhe pse ne paguajmë taksa për këto komuna, qytetarët tanë nuk janë të përfshirë në këto institucione”, thotë Azemi.
Ai thotë se kanë kërkuar që buxheti të ndryshohet nga kryetari tani ose vitin e ardhshëm në mënyrë që të gjitha komunitetet që jetojnë atje të përfshihen edhe në punësime, por edhe në projekte si ndërtimi i shtëpive që janë djegur gjatë luftës, por edhe ndërtimi i disa shtëpive të rasteve sociale.
“Në këtë buxhet nuk është ndarë asnjë linjë buxhetore për ndërtimin e shtëpive dhe ky ka qenë një argument shtesë që ne nuk e përkrahim këtë buxhet”, theksoi Azemi.
Shqiptarët të izoluar dhe pa përkrahje, serbët bëjnë ligjin si ata duan
Por përveç shqiptarëve që jetojnë në komunën veriore të Mitrovicës, edhe ata që jetojnë në komunat tjera si në Leposaviç dhe Zveçan përballen me vështirësi të njëjta, të diskriminuar dhe të pa përkrahur nga institucionet komunale atje, por as nga institucionet qendrore, pasi që këto të fundit nuk guxojnë apo nuk marrin mundin as që t’i vizitojnë dhe t’u japin përkrahje.
“Edhe shqiptarët që jetojnë në komunën e Leposaviçit dhe të Zveçanit, nuk kanë asnjë përkrahje nga këto komuna, janë tërësisht të izoluara e kanë nga një zyrë për komunitete, por ata jetojnë në një geto në një vend të rrethuar komplet me komunitetin serb”, u shpreh Azemi.
Në veri edhe disa nga konkurset e rëndësishme kriter bazik e kanë etninë, pra që personi të jetë i etnisë serbe, ndërsa etnitë tjera nuk kanë të drejtë as që të konkurrojnë, fjala vjen konkursi për komandantin e policisë të Regjionit të Mitrovicës veriore. Kjo është si pasojë e marrëveshjeve të Brukselit, e që realisht paraqet shkelje të Kushtetutës së Kosovës, pasi që kjo Kushtetutë, iu garanton qytetarëve të Kosovës mosdiskriminim në baza etnike, politike, racore sa i përket mundësisë së punësimit.
Por përveç diskriminimeve të lartcekura, serbet nuk lejojnë shqiptarët as të rindërtojnë shtëpitë e tyre, në mënyrë që të pamundësohet kthimi i shqiptarëve.
Gjithashtu serbët nuk paguajnë asnjë faturë të rrymës apo shpenzimeve tjera, e mos të flasim për regjistrim të veturave apo taksave tjera që do të duhej të derdheshin në buxhetin e Kosovës. Ligjet dhe taksat në fjalë vlejnë në mënyrë rigoroze vetëm për shqiptarët e Kosovës.
Serbët në veri përveç që nuk paguajnë energjinë elektrike, ata në fillim të vitit i kanë dërguar fatura shqiptarëve të asaj ane që t’i paguajnë faturat e energjisë elektrike për buxhetin e Serbisë, në të kundërtën i kanë kërcënuar me ndërprerje të energjisë elektrike. Vërejtja me shkrim, që ju është dorëzuar shqiptarëve, përfundon kështu: “Të tregojmë se i respektojmë institucionet e Republikës së Serbisë në këto hapësira, duke i kryer obligimet tona”.
Në lidhje me situatën atje, institucionet qeveritare vazhdojnë të heshtin dhe të mos flasin për këto probleme, ndërsa gojën e kanë plotë me sovranitet dhe shtrirje të vazhdueshme të shtetit të Kosovës në këtë pjesë, ndërsa realiteti tregon krejt diçka tjetër.
Së fundi përfaqësues të listës “serbska” kanë kërkuar që të formohet edhe një batalion etnik serbë në veri dhe me komandant serbë, si kusht për ta votuar ligjin për FSK-në, që e shndërron këtë forcë në ushtri të Kosovës.
/tesheshi.com/
