Nga Bekim Laçi
Në kohën kur djemtë kuqezi të kombëtares shqiptare kishin zbritur në fushën e betëjës kundër Francës, “fusha e blertë” për mijëra shqiptarë të Maqedonisë ishte rruga, ndërkohë që brohoritjet e tyre ishin krejtësisht ndryshe nga ato të cilat u dëgjuan në “Elbasan Arena”, sepse kishin të bëjnë me çështjet ekzistenciale të tyre, të natyrës socio-ekonomike.
Fajtorin e kishin detektuar tek qeveria aktuale, dhe, mu për këtë kërkesa e tyre ishte dorëheqja e saj, zbardhja e të vërtetave për rastet në të cilat kanë pësuar shqiptarët dhe një marëveshje ridefinimi mes maqedonasve dhe shqiptarëve.
Organizatori, Lëvizja Politike Besa, mori përkrahjen e disa subjekteve më të vogla politike shqiptare, rreth 40 OJQ-ve, familjarëve të atyre që vuajnë burgun në rastet e montuara, si dhe të një numri të konsiderueshëm të intelektualeve shqiptarë, ndërsa nevojën, sicc thotë për portalin tesheshi.com, anëtari i Këshillit Koordinues, Skënder Rexhepi-Zejd e kanë parë te ngjarjet e shumta në skenën politike në të cilat shqiptarët sikur mbetën jashtë politikave aktive për tejkalimin e situatës: “Kjo gjithsesi ishte pasojë e gjumit politik të BDI-së dhe PDSH-së, përndryshe përfaqësues në parlamentin e këtij shteti, apo thënë troç, pasojë e kapjes së tyre nga subjekti potitik maqedonas në pushtet. Prandaj ne e kishim mëse të qartë që tash shqiptarët duhej ngritur zërin që të kuptojnë se nuk janë pa përfaqësues”.
Rexhepi thotë se janë realizuar pritshmëritë e tyre për sa i përket numrit të qytetarëve që u derdhën në rrugë, ndërsa akuzon oponentët politikë për “luftë speciale”, sepse sicc thotë, nëpërmjet megafonëve të vet mediatikë kanë tentuar të relativizojnë numrin e protestuesve duke paraqitur shifra të pasakta:
“Është protesta e parë që organizojmë, dhe nga këtu për një parti e cila ditë më parë ka përfunduar strukturimin e vet, kaloi ashtu edhe siç i kishim pritshmëritë, si nga numri, rrjedha e saj, e deri te mesazhet politike të dala nga kjo protestë. Mjafton të shikohen fotografitë dhe videot nga rrjedha e protestës dhe gjithccka bëhet e qartë”, thotë ai, ndërsa për portalin tesheshi.com foli edhe për shantazhet që u janë bërë, në mënyrë që protesta të dështojë:
“Kjo ka qenë pjesë e pritjeve tona sepse e kishim të qartë që kujt i pengon një organizim dinjitoz i protestës dhe ashtu siç afrohej dita, shantazhet ishin në rritje e sipër. Janë kërcënuar kompanitë transportuese, rrugës për në Shkup janë ndaluar autobusët për një kohë më të gjatë dhe gjithë kjo ka qenë e pritshme, por më e dhimbshme ka qenë që banorët e Lagjes së Trimave në Kumanove janë kërcënuar se nëse shkojnë në protestë, atyre nuk do t`u kompensohen dëmet e shtëpive”, thotë Rexhepi
Marshi protestues i të shtunës kishte karakter etnik, me pjesëmarrje vetëm të shqiptarëve, që për bashkëbiseduesin tonë është bërë nga shkaku se vetëm zëri i shqiptarëve mbeti pa u dëgjuar: “Dhe gjithsesi, nga shkaku i asaj që vetëm shqiptarët kanë qenë të diskriminuar gjatë gjithë kohës së ekzistimit të këtij shteti, pavarësisht se cili subjekt politik maqedonas ka qenë pjesë e pushtetit. Andaj, që të flasim për çështje qytetare, duhet që fillimisht shqiptarët të jenë pjesë e barabartë në të gjitha institucionet shtetërore, politike dhe juridike (RIDEFINIMI), që pastaj pasi të konkludojme se shqiptarët janë popull shtetformues dhe të barabartë, atëherë dhe vetëm atëhere mund të flasim për organizime qytetare”, përfundon Skënder Rexhepi-Zejd, sipas të cilit protesta e Besës shumëkujt ja ka prishur “rehatinë” politike dhe jetën korruptive, por ja që populli është ai që vendos se kujt i kushton vëmendje e kujt injorim. /tesheshi.com/
