Nga Blendi Gashi
Brenda më pak se dhjetë ditësh nëse Vetëvendosje dhe LDK-ja nuk dakordësohen për një qeveri të mundshme, kreu i AKR-së, Behgjet Pacolli, mund të ndërrojë kamp politik dhe t’i bashkohet Kadri Veselit e Ramush Haradinajt në bashkëqeverisje, çka e ka konfirmuar në një mënyrë edhe personalisht.
Ai ka lë të kuptohet se do të ndërmarrë një veprim të tillë pasi nuk bllokon institucionet, duke mohuar se këtë e bën për pushtet.
Një veprim eventual i tillë nga Pacolli do të krijonte një situatë të re, mund duket sikur kriza politike është tejkaluar, por në asnjë rrethanë nuk siguron institucione të qëndrueshme që mund të marrin vendime të mëdha qoftë për themelimin e ushtrisë, Demarkacionin apo Asociacionin, pasi qeveria do varej kryekëput nga Lista Serbe dhe teket e saj.
Një “përqafim” i Pacollit me PDK-në dhe aleatët e saj, partisë së tij mund t’i sigurojë për një kohë pushtet, aq sa mund të ketë jetëgjatësi qeveria “Haradinaj”, pra me marrjen e ndonjë ministrie dhe rehatimin e disa zyrtarëve e militantëve të partive, por në kohë afatgjatë pritet që më shumë ta dëmtojë dhe çojë sërish drejt një gremine, ku si parti e vetme vështirë se do mbijetonte në skenën politike.
Arsyeja për këtë është se Pacolli para zgjedhjeve disa herë ka dhënë fjalë të forta se nuk bashkohet më me PDK-në, pasi kjo parti e ka tradhëtuar disa herë dhe nuk do të lejohet të mashtrohet sërish.
Ndaj një mashtrim i radhës i tij dhe vrapimi për të marrë një pjesë të tortës së pushtetit vështirë se do t’i falet sërish nga elektorati.
Ja pse mund ta forcojë dhe LDK-në…
Një tjetër arsye pse vajtja me PDK-në mund të dëmtojë AKR-në dhe të forcojë LDK-në është fakti se Pacolli mund të braktiset nga një prej bashkëpunëtorëve të tij më të afërt vitet e fundit, deputeti Korab Sejdiu, që është nënkryetar i partisë.
Ky i fundit ka bërë të qartë qëndrimin e tij se edhe sikur të gjithë ligjvënësit të votojnë për qeverinë e PAN-it, ai do të japë votën kundër.
Dhe një veprim i tillë, Korabin lehtësisht mund ta çojë tek shtëpia e LDK-së pasi është edhe i afërt me zyrtarët e kësaj partie.
“Unë kam folur një herë dhe po e përsëris: pavarësisht kush është në anën tjetër, edhe nëse 119 deputetët votojnë për të, vota ime do të jetë sikur ka qenë, kundër PAN-it. Pavarësisht kush i bashkohet në formatin aktual, PAN-i nuk e ka votën time. Unë jam konsistent në qëndrimin tim fillestar dhe nuk e ndryshoj”, ka thënë për mediat deputeti Sejdiu.
Ky deklarim i tij tregon qartë se ai kurrë nuk e sheh vetën në një bashkëqeverisje me njerëzit e PAN-it dhe lehtë mund t’i bashkohet grupit parlamentar të LDK-së apo të dalë edhe si deputet i pavarur.
Ndaj Pacolli duhet ta ketë të qartë se me tre votat e partisë së tij (këtu nuk njihet vota e Korabit) nuk e forcon qeverinë “Haradinaj”, por e bën atë plotësisht të varur nga Lista Serbe, parti kjo e minoritetit serb që haptazi deklarohet se punon me urdhrat e Beogradit. /tesheshi.com/
