Nga Bekim Laci
Minituri ballkanik i kancelares gjermane, Angela Merkel, nuk ka si destinacion Maqedoninë, por vetëm Shqipërinë, Serbinë dhe Bosnjën; që do të thotë se Shkupin nuk e ka përfshirë në axhendë. Dhe kjo nuk është hera e parë që ajo injoron Shkupin, pasi kohë më parë Merkel anulloi mikëpritjen për kryeministrin Gruevski në takimin që do mbahej në Berlin.
Kjo ka ngjallur shqetësimin te analistët dhe njohësit e zhvillimeve politike në Shkup, pasi në kohën kur Merkel vjen në Ballkan, Maqedonia po përballet me krizën më të thellë politike që nga pavarësimi i saj, me procese demokratike që shënojnë zbrapsje, me gjygjësor të kontestuar dhe probleme tjera nga sfera e sundimit të së drejtës, si dhe media të kontrolluara nga pushteti.
Të gjitha këto vërejtje, siç thotë analisti politik Mersel Bilalli, e bëjnë Maqedoninë shtet jonormal: “Maqedonia është shtet në kushte jonormale, prandaj nuk mund të zhvillohen vizita normale, aq më pak nga një zyrtare, shteti i të cilës është lokomotivë e BE-së. Mosardhja e Merkelit është mesazh i qartë se në Maqedoni diçka nuk është në rregull”, thotë ai për portalin tesheshi.com, sipas të cilit perceptimi se gjithçka që është e djathtë (siç është VMRO-ja e Gruevskit) ka përkrajen e Merkelit, është një qasje e gabuar sepse ata përkundrazi nuk dëshirojnë qe e djathta të diskreditohet: “Një kohë të gjatë Gjermania ka qenë nën ndikimin e analizave zyrtare në BE të cilat për shkaqe të panjohura kanë patur nota pozitive për Maqedoninë me vërejtje të vogla, të cilat madje janë pasqyruar në raportet e Komisionit Evropian. Tani Gjermania i ka të qarta këto, prandaj, mosardhja e kancelares gjermane mund të llogaritet si embargo diplomatike”, thotë Bilalli.
Ndërsa ish-ministri i jashtëm, Denko Malevski, për zhvillimet e fundit thotë se paraqesin tregues se raportet tona me një shtet siç është Gjermania, të cilin e kemi patur partner në BE, nuk janë në nivel të kënaqshëm, sepse siç thotë, anashkalimi që Merkel i bën Shkupit zyrtar, është reflektim i sjelljes së keqe të pushtetit, gjë që sipas tij ndodh dhe me zyrtarë të tjerë të lartë evropianë: “Qeveria duhet me kujdes të analizojë këto dhe të përmirësojë qasjen që ka”, deklaroi për portalin tesheshi.com Malevski.
Injorimin konsistent, siç e quan ai, gjithsesi nuk e konsideron izolim ndërkombëtar, pasi siç thotë Malevksi, vendi komunikon me shtete tjera nëpërmjet ambasadave, por brengosës sipas tij është refuzimi i zyrtarëve nga shtetet më me ndikim që të vijnë në Maqedoni: “Trajtimi i këtij fenomeni nxjer përfundimin se zyrtarët perëndimorë nuk e kanë për qejfi qeverinë e Shkupit cila duhet të jetë e vetëdijshme se problemi me demokracinë në shtet dhe sistemi jofunksional politik i bën politikanët tanë jokompatibil karshi atyre të BE-së”, tha Malevski.
Ndryshe, Gjermania është një partner strategjik i Maqedonisë dhe përkrahës i euro-integrimeve, ndërsa është gjithashtu shteti i vetëm në BE me të cilin vendi ka sufiçit nga shkëmbimi tregëtar. /tesheshi.com/
