Konflikti disavjeçar mes Izraelit dhe palestinezëve njeh dhe rekordet e veta, si për nga brutaliteti i njërës palë e si për nga vitaliteti i palës tjetër.
Kështu, siç informon AA, ushtarët izraelitë kanë rrënuar për herë të 120-të shtëpitë në fshatin El-Arakib në shkretëtirën Negev, në jug të vendit, me pretendimin se ishin ndërtuar pa leje, dhe kjo në të 120 rastet. Dhe kjo që nga korriku i 2010-ës, siç informoi Aziz et-Turi, anëtar i komitetit të mbrojtjes së Arakibit, i cili më pas u përbetua për ringritjen e tyre pa asnjë tërheqje.
“Ne do t’i vazhdojmë përpjekjet për të jetuar këtu. Sado shpesh që i rrënojnë shtëpitë tona, nuk do të arrijnë ta thyejnë vullnetin tonë për të rezistuar. Ne jemi pronarë të këtyre tokave”, tha Turi.
Në Arakib jetojnë 87 palestinezë, të njohur si shtetas të Izraelit. Por qeveria e Tel-Avivit pretendon se fshati është formuar në mënyrë ilegale dhe se duhet të rrënohet. Ndërsa banorët thonë se toka ku ata jetojnë e ndërtojnë shtëpitë, është trashëgim nga gjyshërit e tyre shumë më parë, para themelimit të Izraelit. /tesheshi.com/
