Një votë e njëzëshme e kabinetit të sigurisë së Izraelit i dha dje miratimin ndërtimit të të parit ngulim të ri në njëzet vjet në Bregun Perëndimor të pushtuar.
“Unë kam bërë një premtim se do të ndërtojmë një ngulim të ri. Sot kemi për ta mbajtur këtë premtim,” do t’u thoshte gazetarëve kryeministri izraelit pak para miratimit.
Miratimi i këtij ngulimi të ri, në një zonë të quajtur Emek Shilo nga izraelitët, të konsideruar ilegal sipas ligjit ndërkombëtar, vjen vetëm në më pak se një javë pasi OKB-ja e kritikoi Izraelin se nuk ka bërë asgjë për të ndaluar ndërtimin e vendbanimeve në territoret e pushtuara palestineze, një kërkesë e përcjellë përmes një rezolute të Këshillit të Sigurimit.
Reagimi i parë palestinez ka ardhur nga Hanan Ashrawi, një anëtare e komitetit ekzekutiv të Organizatës për Çlirimin e Palestinës.
“Njoftimi i sotëm provon përsëri se Izraeli është më i angazhuar të qetësojë popullsinë e vet kolone ilegale se t’u përmbahet kërkesave për stabilitet dhe paqe të drejtë.”
Që prej zgjedhjes së Donald Trump-it si president i SHBA-së, Izraeli ka miratuar ndërtimin e mijëra vendbanimeve të reja, por që kanë qenë shtesa në ngulimet ekzistuese.
Nga administrata e re amerikane nuk ka ende një reagim, e cila raportohet të jetë në diskutime me Izraelin për kufizimin e ngritjes së ngulimeve në territorin palestinez. /tesheshi.com/
