Autoritetet izraelite kanë dhënë aprovimin për ndërtimin e 800 ngulimeve të reja në Jerusalemin Lindor dhe në Bregun Perëndimor.
Ngulimet izraelite konsiderohen të paligjshme nën ligjin ndërkombëtar, e janë një pengesë kryesore në përpjekjet për paqe mes izraelitëve dhe palestinezëve.
Vendimi i marrë të dielën nga kryeministri izraelit, Benjamin Netanyahu, dhe nga minisri izraelit i Mbrojtjes, Avigdor Lieberman, ka për të sjellë rritjen e mëtejshme të tensioneve me palestinezët, që e shohin ndërtimin e ngulimeve si një përpjekje për ta penguar njohjen e një shteti palestinez nëpërmjet ndryshimeve demografike.
Që nga lufta arabo-izraelite në 1967-tën, Izraeli ka ndërtuar më tepër se një duzinë lagjesh vetëm me izraelitë në Jerusalemin Lindor, të aneksuar pas kësaj lufte.
Kuarteti i Lindjes së Mesme, i përbërë nga OKB-ja, Bashkimi Europian, SHBA-të dhe Rusia, i kërkoi në fillim të këtij muaji Izraelit nëpërmjet një raporti që t’i japë fund ndërtimit të ngulimeve nëse e ka seriozisht zgjidhjen me dy shtete në Lindjen e Mesme.
Në tetë muajt e fundit ka një shtim të përplasjeve mes izraelitëve dhe palestinezëve. 200 është numri i palestinezëve të vrarë në këtë periudhë kohore, e 32 ai i izraelitëve. /tesheshi.com/
