Autoritetet serbe kundërshtojnë aplikimin e Kosovës për t’u anëtarësuar në agjencinë e OKB-së për Arsimin, Shkencën dhe Kulturën, UNESCO. Agjencia e Beogradit, Tanjug bëri të ditur përmbajtjen e një letre që ministri i Jashtëm serb, Ivica Daçiç i ka dërguar sekretarit të Përgjithshëm të OKB-së, Ban ki-Moon.
Daçiç thotë se kjo është e papranueshme për Serbinë, për shkak se Kosova nuk mund të konsiderohet si një shtet.
Pavarësisht qasjes së re që Beogradi është zotuar të marrë në rajon, ai nuk e ka ngadalësuar aspak “luftën” kundër integrimit të Kosovës në organizata ndërkombëtare, duke penguar përpjekjet e Prishtinës.
Sipas ministrit të Jashtëm serb, meqënëse Kosova nuk është shtet në arsyetimin e tij, çdo shqyrtim i mundësisë për anëtarësim të Kosovës në këtë agjenci, do të përbënte mospërfillje të ligjit ndërkombëtar. /tesheshi/
