Kryeministrja italiane Giorgia Meloni njoftoi se ka mbledhur një komision ministror për sigurinë kombëtare në mënyrë që qeveria e saj të përballet më me sukses me problemin e numrit në rritje të emigrantëve.
Italia ka probleme në kujdesin ndaj emigrantëve që vijnë nga Afrika e Veriut dhe Ballkani, dhe Kryqi i Kuq Italian ka kërkuar të hënën një reagim më të fortë ndërkombëtar ndaj “kaosit” të shkaktuar nga ardhja e emigrantëve, shkruan Reuters.
Meloni pas mbledhjes së kabinetit ka njoftuar se ka aktivizuar Këshillin Ndërministror për Sigurinë e Republikës (KISR), i cili do të qëndrojë në funksion të përhershëm për të zgjidhur problemin e rritjes së numrit të emigrantëve.
“Qëllimi ynë është ta zgjidhim problemin në mënyrë pragmatike, me vendime të shpejta dhe të koordinuara”, tha Meloni, e cila karrierën e saj politike e ka bazuar në luftën kundër emigracionit të paligjshëm.
Sipas të dhënave të Ministrisë së Brendshme, vitin e kaluar në Itali kanë mbërritur me rrugë detare rreth 113.500 emigrantë, ndërsa vitin e kaluar kanë ardhur rreth 55.800.
Statistikat tregojnë se në tre ditët e fundit ka pasur më shumë, 2300 të premten, më shumë se tre mijë të shtunën dhe gati një mijë të dielën.
Qeveria italiane ka shtypur aktivitetet e anijeve të shpëtimit humanitar, duke sekuestruar tre nga anijet e tyre javën e kaluar.
Por ndërsa vendi përballet me rënie të popullsisë dhe mungesë të fuqisë punëtore, ai ka rritur kuotën e hyrjes për punëtorët migrantë jo-BE në 452,000 për periudhën 2023-2025, nga rreth 83,000 në 2022.
Të hënën, 56 organizata joqeveritare lëshuan një deklaratë të përbashkët duke akuzuar qeverinë në Romë për pengimin e punës së organizatave humanitare në det dhe paralajmëruan se shumë prej tyre, nëse jo të gjitha, mund t’i japin fund operacioneve të tyre si rezultat, duke vënë në rrezik jetën e tyre. /tesheshi.com/
