Mijëra serverë kompjuterësh në Itali dhe në mbarë botën janë shënjestruar nga një sulm ransomware, njoftoi dje Agjencia Kombëtare e Sigurisë Kibernetike e Italisë (ACN), duke paralajmëruar kompanitë dhe institucionet që të marrin masa për të mbrojtur sistemet e tyre.
Sulmi haker u përpoq të shfrytëzonte një dobësi të softuerit, tha shefi ekzekutiv i ACN Roberto Baldoni për Reuters, duke shtuar se sulmi ishte masiv.
Agjencia italiane e lajmeve ANSA, duke cituar ACN, raportoi se serverët dyshohet se janë komprometuar në vende të tjera evropiane, si Franca dhe Finlanda, si dhe në Shtetet e Bashkuara dhe Kanada.
Dhjetra organizata italiane me gjasë u prekën dhe shumë të tjera u paralajmëruan të merrnin masa për të shmangur prishjen e sistemeve të tyre.
Klientët e Telecom Italia raportuan probleme me internetin më herët të dielën, por dy problemet besohet se nuk kanë lidhje. /tesheshi.com/
