Islanda është përkujdesur të rezervojë surprizën e natës së enjte duke mposhtur Holandën (1:0), në ndeshjen e grupit A, e vlefshme për kualifikimet në Euro 2016. Pas këtij triumfi islandezët kanë siguruar kualifikimin duke kryesuar kështu grupin me 18 pikë, ndërkohë tulipanët rrezikojnë ta shohin Europianin nga shtëpia, pasi tani ndodhen në vendin e katërt me 10 pikë.
Turqia gjithashtu rrezikon të mbetet jashtë kampionatit Europian pasi ka barazuar në shtëpi me Letoninë (1:1). Këto rrëshqitje të rivalëve direkt i ka shfrytëzuar Republika e Çekisë që ka mposhtur Kazakistanin (2:1), për të rezervuar vendin e dytë, deri sa kazakët mbeten pa asnjë mundësi.
Në grupin B, Uellsi bën një tjetër hap para drejt sigurimit të biletës që e dërgon vitin tjetër në Francë, deri sa ka mposhtur Qipron në udhëtim (1:0), me golin e vetëm të realizuar nga Bejll. 
Ndjekësi më i afërt i ishullorëve, Belgjika ka realizuar një fitore tjeter të vlefshme ndaj Bosnjës dhe Hercegovinë (3:1), për të vrarë dy zogj me një gur, pasi në këto kushte ballkanasit mbeten jashtë Europianit.
Ndërkohë, në takimin e fundit të këtij grupi, Izraeli e ka shfrytëzuar “turizmin” e Andorrës për ta mposhtur bindshëm (4:0), duke mbajtur gjallë kështu shpresat për një kualifikim të mundshëm.
Në grupin H, shohim një Itali të zakonshme që mjafton të qëllojë njëherë portën rivale për të marrë maksimumin e ndeshjes. Azurët mezi mposhtën inferiorët e Maltës (1:0) për të vazhduar rrugën e sigurtë drejt kualifikimit pasi udhëheqin grupin me 15 pikë.
Kroacia ndjekësi më i afërt i italianëve bën një hap fals, pasi ndalet nga Azerbejxhani pa gola (0:0). Norvegjia shfrytëzoi në maksimum këtë rrëshqitje të ballkanasve, që falë fitores ndaj Bullgarisë (1:0), i afrohet vetëm me një pikë dieferencë kroatëve. /tesheshi.com/
