Ish-presidenti Bamir Topi, ka bërë ndoshta deklaratën më të ashpër kundër ish-eprorit të tij partiak, Sali Berisha, që kur nisi ndarja mes e madhe mes tyre, pas ngjarjeve 21 janarit. Dhe ka qenë pikërisht për këtë datë, viktimat e asaj dite. Në një interviste në “Klan Kosova”, ish-kreu i shtetit shqiptar dhe njëherësh ish-numri dy i PD-së tha se çuditej se si mund që Berisha mos jetë në burg për vrasjet e bujshme.
“Të gjitha ato akuza nxjerrin sot Sali Berishën njeriun më të akuzuar përpara drejtësisë. Qoftë edhe një prokuror i rëndomtë, pa patur ndonjë përvojë, duke paraqitur faktet nga ana e tij në sens kronologjik, do të shihnin mjaft kontradiksione që për profesionin e tyre konsiderohet fajtor”, u shpreh Topi, që sot drejton një parti të tijën, po ende pa shumë peshë në jetën politike, Frymën e Re Demokratike.
Po duke qëndruar tek 21 janari, Topi u shpreh mosbesues për reformën në drejtësi, duke thënë se të angazhuarit me të nga opozita, janë pikërisht ata që implikuan veten në padrejtësinë e madhe të asaj ngjarjeje.
“Dhe gjëja akoma më e rëndë është që, ngritja e komisionit hetimor, është i vetmi komision që u shty disa herë dhe e përfundoi punën e vet pa raport. Pjesa kryesore e këtyre, sot janë protagonistët e reformës në sistemin e drejtësisë.T’i marrim me radhë, qoftë edhe ai që ka dalë nga radhët e Partisë Demokratike, Ilir Rusmali. U mor si ekspert i qeverisë. Ky është një paradoks dhe çudi e madhe. Enkelejd Alibeajn e ke atje. Eduard Halimin e ke atje. Kush na jep ne garanci se do të kemi një reformim real të sistemit të drejtësisë, kur njerëz që kanë suportuar padrejtësitë e një pushteti që vrau 4 njerëz në bulevardin e Tiranës, janë sot njerëzit që do të japin opinione sesi do të jetë drejtësia nesër”, tha Topi. /tesheshi.com/
