Bradislav Gashiç është një drejtues i Partisë Progresiste të kryeministrit serb, Aleksandër Vuçiç dhe ka qenë në postin e Ministrit të Mbrojtjes në qeverinë e shkuar serbe.
Pak muaj më parë u fol se Gashiç, i cili jeton në Krushevac, ka origjinën nga Kosova dhe prejardhjen e ka nga fisi i famshëm shqiptar “Gashi”.
Por politikani serb e mohoi, duke thënë se është serb denbabaden, dhe se është një nga ata serbë që lidhjen me Kishën Ortodokse e ka në gjak.
Por ç’ka bërë Bradislavi që sot ka qenë në syrin e ciklonit të mediave serbe, me gjasë për t’u treguar “më katolik se Papa”, e në këtë rast më ortodoks se Patriarku Irinej?!
Vëllai i ish-ministrit, Boban Gashiç, administron një biznes shumë të fuqishëm që thonë se e ka bashkë me të vëllanë.
Vellëzërit Gashiç kanë financuar ndërtimin e një kishe në Kushevac, përkatësisht kishës së Shën Jovanit.
Kisha është financuar edhe nga biznesmen i dyshimtë rus, Ljubomir Çurçiç.
Në muret e kishës është pikturuar një afresk i Shën Jovanit, natyrisht me veshjet e kohës që janë një mantel i mesjetës së hershme.
Dhe çudia e madhe është se në afresk, janë shtuar dy portrete: përkatësisht të Bradislav Gashiçit dhe vëllait Boban, që ngjajnë si dy pika uji.
Të veshur me kostume “alla frënga”, vëllezërve Gashiç u është shtuar një mantel lejla dhe në dorë mbajnë kishën e qytetit si maket që po ia dhurojnë Shën Jovanit.
Me një fjalë një afresk tallava që ka çuditur tërë opinionin publik për marrëzitë që bëjnë politikanët, por edhe për hipokrizinë dhe joseriozitetin e institucioneve të kultit.
Gazeta më e madhe serbe Blic e ka botuar e para këtë fakt dhe ngre alarmin për çmendurinë e politikanëve.
Kurse B92 e cilëson një “shaka të turpshme”.
Vetë ish-ministri ka thënë për gazetën Blic se është biznesmen dhe mund të bëjë ç’të dojë me paratë e tij.
Në kohën kur ishte ministër i Mbrojtjes, Gashiç u shkarkua pasi shkaktoi një skandal publik: i hodhi ujë të nxehtë në fytyrë gazetarit të B92-shit, Zlatija Laboviq, që e kritikoi në një konferencë shtypi, me të cilin pati edhe replika të ashpra.
Kurse gazetari Milan Popoviç, shkruan në twitter: “Gashiq zbret me helikopter në afresk drejt e nga qielli. Qenka njeri i shenjtë!”.
Zakonisht piktorët e afreskeve i kanë marrë motivet e portreteve të tyre nga jeta reale dhe përgjithësisht i gjenin nga elita aristokrate që financonte. Por portreti bëhej në mënyrë të fshehtë, duke marrë thjesht motive.
Ndërsa në këtë rast, është kopjuar totalisht portreti i politikanit dhe vëllait të tij, ashtu me flokë, e i rruar taze, e jo mesjetar, ku së paku mjekra dy pashë duhej të ishte patjetër. Por më e keqja se kanë edhe kostum alla frënga..
“Me një fjalë kemi të bëjmë me shenjtëri tallava që del direkt e nga pijetorja”, shkruan B92…
Y.Pata – /tesheshi.com/
