Ish-deputeti demokrat Enkelejd Alibeaj, ka reaguar sërish ndaj zv/kryeministrit Braçe, pas sulmit që ky i fundit po bën prokurorit të Durrësit Arjan Ndoja, për të cilin aludohet se është “prokurori bandave”, sipas një cilësimi të kryeministrit Rama. Ndoja po gjykon kreun e Kadastrës në Durrës, Liridon Pula, të cilin Braçe po e merr në mbrojtje.
“Ju e dini fare mirë se cili ka qenë qëndrimi i Partisë Demokratike në kohë për prokurorin në fjalë.
Ajo që presin sot qytetarët shqiptarë nuk është a ka Erjon Braçe lidhje gjaku me drejtorin e arrestuar të Kadastrës. Kjo nuk ka pikë rëndësie për çështjen në fjalë.
Dje dhe sot, Erjon Braçe, bashkë me Edi Ramën, i bënë presion drejtësisë në sallën e gjyqit për të mbrojtur një zyrtar të emëruar nga vetë ata dhe që akuzohet për shpërdorim detyre nga një prokuror, që është në shërbim të bandave të Durrësit- citoj kryeministrin dhe zëvendëskryeministrin e vendit – tha Alibeaj në një deklaratë, duke vijuar më pas:
“Është urgjente që Edi Rama të përgjigjet për disa pyetje që sot ia bën çdo shqiptar.
Cilës bande të Durrësit i shërben prokurori Arjan Ndoja?
Prej sa kohësh Edi Rama është në dijeni të faktit që Arjan Ndoja punon për bandat dhe jo për shtetin?
Pse heshti Edi Rama dhe Erjon Braçe deri më sot dhe nuk dolën përpara se të arrestohej njeriu i tyre në Kadastrën e Durrësit?
Këtyre pyetjeve Edi Rama duhet t’u japë përgjigje menjëherë. Pjesëmarrja e paprecedente e një zëvendëskryeministri në një seance gjyqësore dhe shantazhi publik nuk i shërben as ligjit, as të vërtetës, as drejtësisë”, tha ndër të tjera Alibeaj, për të cilin Braçes paralajmëroi se do e hedh në gjyq. /tesheshi.com/
