U largua nga pozita e ambasadorit të Shqipërisë për të garuar për të parin e komunës së tij, pra Drenasit, nën petkun e PDK-së.
Zgjedhja e tij si kandidat i kësaj partie ngjalli mospajtime tek dy bashkëpartiakët e tij, Xhavit Drenori e Naim Bazaj të cilën vendosën të garojnë si të pavarur pasi që nuk morën përkrahje nga partia.
Bëhet fjalë për Ramiz Lladrovcin, i cili tregon pse vendosi që të lërë Shqipërinë për Drenasin.
Ai vlerëson dy kundërkandidatët e tij, por thotë se vet përcaktimi i partisë që ai të jetë kandidat tregon se edhe të tjerët duhet ta mbështesin kandidaturën e tij.
Lladrovci, në një intervistë dhënë për tesheshi.com shprehet i bundur se PDK do të mbetet e pamposhtur në Drenas, pasi thotë se ai është njeriu më i duhur për të marrë drejtimin e komunës për çka beson fuqishëm se do të ndodh një gjë e tillë.
Intervistoi: Blendi Gashi
Lladrovci, ju keni lënë postin e ambasadorit në Shqipëri për të kandiduar për kryetar në komunën tuaj, Drenasin. Pse një vendim i tillë në momentet e fundit?
Kam qenë i nderuar me besimin nga ana e partisë dhe nga njerëzit e vendit tim që të jem kandidat për Drenasin në zgjedhjet e jashtëzakonshme, të cilat u imponuan padrejtësisht pas një vendimi të padrejtë që u bë nga gjykata ndaj bashkëluftëtarëve, në mesin e të cilëve edhe ndaj kryetarit të deritashëm, Nexhat Demaku. Unë do të përpiqem ta bëj më të mirën e mundshme për qytetarët e Drenasit dhe për të gjithë ata që do të më besojnë pas zgjedhjeve të 4 dhjetorit.
Pse PDK vendosi për ju e jo për bashkëpartiakët tuaj, Xhavit Drenori apo për Naim Bazaj? Çfarë ju bën kandidat më të fortë se dy të lartcekurit?
Realisht, edhe unë e edhe PDK i çmojmë dhe respektojmë vlerat e atyre që ju i përmendet. Por, konsideroj se vetë fakti që PDK u përckatua për kandidaturën time, tregon mjaftueshëm se edhe të tjerët duhet të besojnë në mua. Personalisht do ta mbështesja secilën kandidaturë që do ta propozonte partia, udhëheqja e saj më e lartë. Mendoj se dhe të tjerët duhet rezonuar kështu.
A është e vërtetë se kryesia e partisë në Drenas ka kundërshtuar kandidaturën tuaj dhe se Kadri Veseli po e përçan partinë?
Jo. Së fundmi kryetari Veseli është takuar me të gjithë strukturën e Degës së PDK-së dhe me mua, bashkërisht. Ka dakordim të plotë për kandidaturën e partisë, që në këtë rast, jam unë. Mbështejtja për mua ka ardhë, madje, edhe nga struktura jashtë PDK-së, siç është Iniciativa Qytetare e Drenasit, e udhëhequr nga ish-kryetari i kësaj komune, Izet Ibrahimi dhe aktivistë të hershëm e të tanishëm të Drenasit, këtu e në diasporë.
Drenasi, dihet se është një bastion i PDK-së. Duke parë se dy bashkëpartiakë tuajit do të garojnë të pavarur, a prisni 17 vjet pas lufte PDK të humb pushtetin në këtë komunë?
Qytetarët e Drenasit e dinë vlerën dhe peshën e secilit. Pa dashur që t’i minimizoj vlerat dhe t’ua mohoj ambiciet të tjerëve, unë jam i bindur në fitore. Konkurenca e brenshme dhe e jashtme duhet parë si vlerë e jona e përbashkët, ndërsa pesha politike dhe besimi që gëzojmë te bashkëqytetarët tanë në Drenas është diçka tjetër. Atë do ta shohim më 4 dhjetor. Por, unë jam i bindur në fitoren time dhe të PDK-së, ashtu siç jam i bindur dhe besoj shumë në vlerat tona të përbashkëta. Sprovat dhe besimi te njerëzit janë dëshmuar nëpër kohë e vite, nga secili prej nesh. Ato nuk janë të sotme dhe as të improvizuara.
Pse qytetarët e Drenasit duhet t’ju votojnë juve e jo kundërkandidatët tuaj? Ç’ofertë keni për bashkëqytetarët tuaj? Cilat janë tre projektet që pritni t’i realizoni nëse zgjedheni kryetar?
Unë si kandidat i PDK-së jam oferta më e mirë për Drenasin dhe qytetarët e saj. Gjithashtu, të kandidosh duhet të kesh së paku edhe një lloj CV-je, një lloj dëshmie nëpër vite dhe një vizion më të qartë për të ardhmen e njerëzve, të cilëve ua kërkon votën. Për projektet, më lejoni të flas në kohë fuashte dhe në momentin e duhur.
Nëse dështoni më 4 dhjetor, a do t’i uroni fitoren kundërshtarit tuaj, cilido qoftë ai që merr besimin e qytetarëve të Drenasit?
Mendoj që këtë pyetje duhet t’ua bëni kundërkandidatëve. Ata duhet të përgatiten për të më uruar.
Për fund, a mund të tregosh ndonjë eksperiencë më të veçantë që ke pasur në Shqipëri si ambasador? Pra, ndonjë takim që ke zhvilluar me krerët atje apo diç tjetër?
Ka qenë specifike krejt koha ime atje. Isha ambasador i vendit tim në vendin tim, në një farë mënyre. Përfaqësues i një pjese të atdheut në një pjesë tjetër. Megjithatë ka qenë interesante. Duhet veçuar se njeriu i parë që më ka pritur si ambasador të Kosovës në Shqipëri, ka qenë ambasadori i SHBA-së në Shqipëri. Dhe bashkëpunimi më i ngushtë ka qenë në po këtë relacion. Si e arritur e kësaj kohe është edhe kontributi dhe angazhimi në krijimin e klimës dhe të rrethanave për bashkëpunim më të ngushtë ndërshtetror midis Kosovës dhe Shqipërisë, takimet e rregullta midis dy qeverive etj. /tesheshi.com/
