E ka nisur me stilin e tij misionin e tij në Tiranë Aleksandër Arvizu, Drejtori i Departamentit të Shtetit për Luftën ndaj Drogës, të cilin siç duket qeveria Trump e ka dërguar si negociator për krizën në Tiranë.
Një e dielë me dreka e darka me analistët pranë opozitës, Artur Zheji dhe Alfred Lela, më pas me ata të mazhorancës, për të nisur pastaj takimet me liderin e opozitës, Lulzim Basha dhe kryeministrin Edi Rama.
Duket pak bizare caktimi i tij si i dërguar në Tiranë, pasi ai ka dy momente të rëndësishme të misionit të Arvizusë dhe që të dyja lidhen me Sali Berishën.
Pas 21 janarit, ai e cilësoi kryeministrin e atëhershëm “burrë shteti” pasi ai e anuloi një antimiting të paralajmëruar të përkrahësve të tij në shesh.
Ndërkohë, po Berisha me qarqet e tij, tre ditë para zgjedhjeve të 23 qershorit 2013 shkarkuan Arvizunë me anë të një lajmi të shpërndarë, por që në fakt Uashingtoni e la në detyrë edhe një vit më gjatë, ku pati një përplasje të fortë me PD-në.
Po cili është misioni i Arvizut në Tiranë?
Ai drejton Byronë e Departamentit të Shtetit për Luftën ndaj drogës, e cila është ngritur prej 5 vitesh.
Në detyrën e tij Arvizu është hera e dytë që vjen në Tiranë, herën e parë erdhi pikërisht për parata e drogës të investuara në Shqipëri.
Megjithëse i veshur me mister, duket se DASH e ka dërguar Arvizunë meqë plotëson dy kushte: e njeh shumë mirë Shqipërinë por edhe aktorët politikë në vend, dhe se pozicioni i tij në lidhje me drogën ka pjesë tek akuzat apo shqetësimet e opozitës që trafikantët e drogës në vend do të përdoren për të financuar fushatën e zgjedhjeve.
Arvizu pritet të sjellë një propozim që t’i pëlqejë Lulzim Bashës, i cili do të përmbajë krijimin e një komisioni që do të drejtohet nga një përfaqësues i opozitës, por që në të do të marrë pjesë edhe një zyrtar i SHBA për të monitoruar përdorimin e parave të kanabisit në fushatën zgjedhore.
Nuk dihet ende nëse opozita do ta pëlqejë misionin e ish-ambasadorit mik të kthyer më pas në armik, i cili në rastin e armëve kimike u përplas me Bashën pasi ky i fundit në fillim tha se opozita e mbështet shkatërrimin e tyre në Shqipëri dhe më pas doli në protesta.
Nuk dihet ende nëse do të takojë kreun e Kuvendit Ilir Meta, por burime diplomatike bëjnë të ditur se do të takohet me ish-kryeministrin Berisha në zyrën e tij private.
Nga ana tjetër, kryeministri Edi Rama dhe kreu i LSI-së, ILir Meta kanë darkuar mbrëmë për 4 orë dhe siç mësohet nuk kanë rënë dakord për koalicionin e ri por për një ofertë ndaj opozitës për zgjidhjen e krizës.
Rama dhe Meta kanë biseduar për rrugën sesi do të shkohet në zgjedhjet presidenciale dhe në ato parlamentare dhe kanë lënë për një kohë tjetër çështjen e koalicionit.
Ndërkaq, Arvizu pritet që sot të diskutojëpikërisht propozimin e ri të SHBA-së që palët të uleen në tryezë ndërkohë që Uashingtoni dhe Brukseli bëhen garante të zgjedhjeve të 18 qershorit me anë të një komisioni të posaçëm monitoriues si ai i Vetingut. /tesheshi.com/
