Nga Bashkim Kastrati
Kryeministri i Kosovës Isa Mustafa. sot gjatë mbledhjes së Qeverisë ka thënë se në ditët në vazhdim do të riprocedohen amendamenti për ndryshimin e Kushtetutës së Kosovës që ka të bëjë me themelimin e Gjykatës Speciale.
“Në ditët në vijim duhet të punojmë që të riprocedohen në Kuvend amendamenti”, ka thënë Mustafa, teksa ka shtuar se duhet të bashkërendohen qëndrimet me opozitën.
Ai ka kujtuar se më parë, një pjesë e opozitarëve kishte premtuar votën pro për Specialen.
Mustafa ka thënë se është fat i keq për Kosovën të themelohet jashtë vendit Gjykata Speciale. E në lidhje me mos votimin e djeshëm, Mustafa ka thënë se së në asnjë rast nuk duhet ti gëzohemi këtij fakti si detyrim.
”Në nuk duhet t’i gëzohemi mosvotimit të djeshëm, por duhet t’i shohim si suksese zotimet e dhëna ndaj SHBA dhe BE” ka thënë Mustafa duke shtuar se ky takim ishte i karakterit për t`i përmbushur detyrimet e Qeverisë.
Ndërsa zëvendëskryeministri Hashim Thaçi, ka insistuar sërish që Kosova ta themelojë Gjykatën Speciale, e jo kjo gjykatë të krijohet nga Organizata e Kombeve të Bashkuara.
Thaçi ka thënë se shumica e deputetëve të Kuvendit të Kosovës ishin pro themelimit të Gjykatës Speciale, që siç ka thënë është obligim karshi ndërkombëtareve.
“Bashkërisht të themelojmë Gjykatë, mos ta lejojmë që të themelohet nga OKB-ja”, ka thënë Thaçi.
Haradinaj: Mbledhje të tilla të qeverisë të mbahen për krijimin e vendeve të punës e jo për specialen
Në lidhje me gjykatën speciale ka folur edhe lideri i AAK-së Ramush Haradinaj. Ai në kuvendin zgjedhor të të rinjve të AAK-së, ka thumbuar krerët e qeverisë duke thënë se mbledhja e qeverisë e cila është bërë sot, për të larë mbarën e të djeshmes, do të ishte më e dobishme sikur të diskutonte se si të krijohen vende të punës për qytetarët, transmeton Klan Kosova.
“Derisa dikush i kryen punët tona ne kurrë s’do të aftësohemi vet”, ka thënë Haradinaj, duke shtuar se për shqiptarët ka ende padrejtësi dhe ne duhet tu bëjmë ballë atyre. /tesheshi.com/
