Ndërsa presidenti Thaçi ka rinisur dialogun me Serbinë për ku ka takuar këtë javë homologun serb Aleksandër Vuçiç, kjo gjë siç duket nuk po i pëlqen anëtarit të AAK-së, Smajl Latifi.
Ai mendon se vetëm Haradinaj si kryeministër do të ndryshojë kontekstin e marrëdhënieve mes Kosovës dhe Serbisë, për çka ka dhënë gjashtë arsye.
Sipas tij, me Haradinaj në krye të qeverisë së pari marrëdhëniet me shtetin serb do jenë shumë më të qarta duke e zbatuar parimin e reciprocitetit, ku pohon se Kosova nuk do të trajtohet edhe më tej si një kuazi-shtet dhe hambar ku gjithë të tjerët marrin nga pak prej saj.
“Së dyti, Kosova nuk ka përse të bisedojë me Serbinë se si ta bëjë organizimin e vet të brendshëm politik dhe territorial. Së treti, Kosova s’ka përse të bisedojë me Serbinë as për Veriun e as për serbët që jetojnë në Kosovë, sepse ata do të trajtohen në pajtim të plotë me ligjet tona në fuqi. Së katërti, Kosova do ta bëjë ushtrinë e vet dhe për këtë çështje nuk ka përse të pritet derisa të lejojë fqinji ynë, Serbia. Së pesti, serbët e Kosovës duhet t’ua bëjnë të qartë përfaqësuesve të vet politik se kjo është Republika e Kosovës dhe ne jemi pjesë e saj. Së gjashti, me Serbinë mund të bisedohet vetëm si të barabartë, si dy shtete të pavarura që e njohin njëri-tjetrin”, ka shkruar Latifi në Facebook.
Ai më tej kërkon nga deputetët ta japin votën e tyre pro qeverisë pasi thotë se Haradinaj është i vetmi poitikan që mund ta jetësojë siç thotë një kurs të drejtë ndaj Serbisë.
“Me interesin që ka vendi për ridefinimin e marrëdhënieve me Serbinë, në mënyrë që të mundësohet forcimi i pozitës së Kosovës dhe shqiptarëve në rajonin e trazuar, atëherë deputetët e zgjedhur duhet të mendojnë me kokë të ftohtë e ta votojnë qeverinë Haradinaj, në mënyrë që të jetësohet më lehtë i vetmi kurs politik i qartë e i drejtë ndaj shtetit të Serbisë”, ka shkruar Latifi. /tesheshi.com/
