Marrëveshja me Iranin për programin bërthamor duket se ka afruar dy liderët, presidentin amerikan, Barack Obama dhe atë rus, Vladimir Putin, të cilët së fundmi për shkak të krizës në Ukrainë ishin distancuar në qëndrime.
Shtëpia e Bardhë njoftoi se Obama zhvilloi një bisedë me presidentin rus pikërisht për marrëveshjen e arritur në Vjenë. Telefonata u zhvillua ndërsa Obama ndodhej në avionin presidencial, Air Force One. Shefi i Uashingtonit ka falënderuar Putin për “rolin domethënës të luajtur nga Rusia për arritjen e një guri kilometrik si është marrëveshja me Iranin”.
Pas një serie masash diplomatike kundër Rusisë, dhe sanksioneve ndaj Moskës për rolin e saj në konfliktin në Ukrainë, marrëdhëniet mes palëve janë cilësuar në nivelin e Luftës së Ftohtë. /tesheshi/
