Aplikimi i Kosovës për t’u pranuar në UNESCO, agjencinë e OKB-së për trashëgiminë kulturore, ka gjetur mbështetje nga sopranoja me famë botërore, Inva Mula. Këngëtarja ishte fundjavën e kaluar në Kosovë, ku mori pjesë në aktivitetet me rastin e ditës Ndërkombëtare të Bamirësisë.
Duket qëndrimi dhe bisedat në Prishtinë kanë bërë që ajo të prononcohet qartë në mbështetje të anëtarësimit të Kosovës në UNESCO e këtë e ka bërë përmes një shkrimi të botuar në revistën “La Lettre Diplomatique”.
Në këtë shkrim, Inva Mula u bën thirrje shteteve anëtare të UNESCO-s, selia e së cilës gjendet pikërisht në Paris, të pranojnë Kosovën.
Letra e Inva Mulës nis me një përshkrim të ndjesive të saj për artin dhe të ndjerit qytetare e botës, gjë që është zhvilluar natyrshëm përmes edukimit të saj dhe koncerteve që ka dhënë, më pas, si këngëtare e formuar në skenat të ndryshme nga Prishtina në Tokio, Moskë, Londër, Neë York,Buenos Aires,Milano,Vjenë, San Paolo, Madrid, Pekin etj etj.
“Kam kënduar në site të mbrojtura nga UNESCO dhe në evente të UNESCOs. Në të parat kam ndjerë pakohshmërinë – objekte kulturore të ndërtuar nga paraardhës tanë dhjetra shekuj më herët, sot janë pasuri e mbarë njerëzimit. Kufijtë kohorë kapërcehen natyrshëm dhe ngjarja mund të ndodhte kurdo si për të na ndërmendur për metafizikën e muzikës dhe kulturës.
Në evente të UNESCO-s kam marrë pjesë dhe shoh se si kjo organizatë zbut diferencat, përafron njerëzit, formëson koncepte, inicion aksione, duke krijuar një komunitet të qëndrueshëm dhe të emancipuar”, shkruan sopranoja e famshme.
“Është ora që UNESCO t’ia hapë dyert njerëzve të Kosovës”, e përfundon ajo shkrimin e saj në “La Lettre Diplomatique”. Kështu, edhe shqiptarët duket se do të kenë mbështetje e lobim në UNESCO, përkundër përpjekjeve të shumta që po bëjnë serbët për ta penguar me të gjitha mënyrat aplikimin e Kosovës. /tesheshi.com/
