Intervista e dhënë nga presidentja e Kosovës, Atifete Jahjaga për rrjetin televiziv gjerman, ZDF ka shkuar në mënyrë jo të përshtatshme për shkak se presidentja nuk e ka dëgjuar në asnjë moment moderatoren dhe ndërhyrjet e saj. Me anë të një deklarate për mediat, Jahjaga shpreh indinjatën për mënyrën sesi është trajtuar në media kjo intervistë, megjithëse së pari lajmi është dhënë nga gazetat gjermane. Transkriptimi me humor që ato i kanë bërë intervistës, duke aluduar se Jahjaga iu shmang pyetjeve të moderatores për valën e emigrantëve kosovarë në Gjermani, u përsëritën më pas në shtypin e Prishtinës dhe Tiranës.
Gjithsesi, Jahjaga pretendon në deklaratën e nxjerrë në zyra e saj se nuk i ka injoruar ndërhyrjet e moderatores gjermane, por nuk i ka dëgjuar ato.
Intervista për televizionin gjerman ZDF është zhvilluar nga studiot e RTK-së në Prishtinë, përmes videolinkut, me përkthyes simultan nga gjermanishtja në anglishte, drejtpërdrejt nga studiot e ZDF-së, thuhet në deklaratë.
“Presidentja Jahjaga ka vepruar në respektim të medias së cilës ka pranuar t’i japë intervistën dhe nuk e ka injoruar në asnjë moment as moderatoren dhe as median e saj. Çështjet teknike, të parregulluara dhe plotësisht të papërshtatshme për një intervistë të tillë, janë lëshim i organizatorit dhe jo tendencë për shpërfillje e presidentes”, pëfundon zyra e Jahjagës. /tesheshi/
