As eksperimenti me Stefano Pioli-n nuk i dha zgjidhje sezonit të Interit, që tani renditet në vend të shtatë në klasifikimin e Serisë A, e rrezikon seriozisht të mbetet jashtë aktiviteteve europiane në sezonin e ardhshëm.
Pa fituar në shtatë takimet e fundit të kampionatit, me të fundit humbje atë në Xhenova, te Interi kanë nisur të hedhin sytë për të gjetur një tjetër trajner. Siç pohojnë mediat sportive italiane, pronarët kinezë kanë piketuar dy emra.
Antonio Conte dhe Diego Simeone janë të kërkuarit për Interin, ndërkohë që për ta është në pritje një pagesë prej 15 milionë eurosh në sezon.
Te Interi e dinë mirë se do të jetë shumë e vështirë që njëri prej tyre të bindet për misionin e ri te klubi milanez, por fillimisht do të pritet që Çelsi të sigurojë titullin në Premier League e që Atletiko të mbyllë llogaritë me Realin në Champions League.
Në rast dështimi të negociatave me një prej këtyre dy emrave, do të kërkohet marrja e Luciano Spalletti-t, në krye të Romës gjer në fund të kampionatit italian.
Leandro Jardim, Paulo Sousa, Cesare Prandelli dhe Eusebio Di Francesco janë gjithashtu mes teknikëve që e gjejnë veten të marrë në konsideratë te Interi. /tesheshi.com/
