Claudio Ranieri nuk i shpëtoi dot fatit të tij të zakonshëm: shkarkimit! Edhe pse italiani bëri mrekullinë vitin e shkuar me Lestër Sitin, duke e shpallur kampion të Anglisë këtë skuadër që si objektiv të vetëm ka ngahera qëndrimin në Premier League, ai nuk e shmangu shkarkimin.
Një veprim i paralajmëruar prej kohësh, që me kalimin e janarit, të mbyllur si mos më keq për kampionët. Vendi i 17-të në kampionat nuk lë vend për asnjë fjalë pozitive.
Kupa duket të jetë mbushur me humbjen ndaj Seviljes në Champions League. Ranieri u shkarkuar me të arritur nga Spanja, por vendimi sugjerohet të jetë marrë shumë më herët.
Shkarkimi nuk është pritur mirë nga një masë e madhe njerëzish në Angli që i përkasin futbollit dhe jetojnë me të.
Gary Lineker, ish-sulmuesi i Anglisë dhe një njeri që nuk besonte aspak te Ranieri përpara se Lestëri të shpallej kampion, e ka quajtur të pafalshëm shkarkimin.
“Pas gjithçkaje që Claudio Ranieri ka bërë për Lestër Sitin, ta largosh atë tani është e pashpjegueshme, e pafalshme…,” reagoi ai në rrjetet sociale.
Një tjetër ish-sulmues i Anglisë, Michael Owen, e quan turp të plotë shkarkimin.
“Kam humbur shumë sot nga dashuria për lojën e bukur,” do të shtonte ai në mënyrë kuptimplote.
“Shkarkohet kampion i Anglisë dhe trajneri i vitit i FIFA-s. Ky është futbolli i ri Claudio. Askush nuk mund ta fshijë historinë që ju shkruat,” janë fjalët e Jose Mourinho-s. /tesheshi.com/
