Jakub Memoni, i dënuar për pjesëmarrje në shpërthimet e njëpasnjëshme në Mumbai në vitin 1993, që u morën jetën më tepër se 250 njerëzve, u var mëngjesin e sotëm. Ekzekutimi u krye vetëm pak pasi kërkesa e tij për falje nuk u pranua nga presidenti dhe Gjykata e Lartë.
Një seri prej 13 shpërthimesh goditën kryeqendrën tregtare të vendit më 12 mars 1993, e si pasojë e tyre vdiqën 257 persona, dhe 713 u plagosën.
Gjyqi ndaj të akuzuarve nisi më 30 qershor të 1995-ës. Gjykatësit e shpallën fajtor Jakub Memonin për komplotim dhe për financim të shpërthimeve. Nga 11 të dyshuarit për rolin e tyre në ato sulme, vetëm Jakub Memoni u dënua me vdekje.
Memoni u ekzekutua në 53-vjetorin e tij, në burgun e Nagpurit, pasi dhe peticionet e avokatëve dhe aktivistëve kundër varjes së të dënuarit nuk gjetën përgjigje pozitive.
I ekzekutuari mbahet mend për fjalët e tij tërë zemërim kur gjykata e deklaroi atë fajtor më 12 shtator 2006. “Njerëzit e pafajshëm po quhen terroristë,” pati thënë ai, duke shtuar, “Ne tashmë jemi damkosur si terroristë, dhe do të përballemi me pasojat.”
Tre prej të pretenduarve si pjesëmarrës në shpërthimet, Tiger Memoni, Davud Ibrahimi dhe Muhammed Dossa, janë prej vitesh në arrati, dhe mendohet se gjenden në Pakistan. /tesheshi.com/
