Nga Blendi Gashi
Zgjedhjet e 11 qershorit i dhanë një goditje të madhe dy partive që qeverisën vendin për 18 vjet PDK e LDK-së duke i renditur si parti të vetme politike pas Lëvizjes Vetëvendosje që doli e para duke dyfishuar votat në krahasim me zgjedhjet e 2014-tës.
Këto rezultate treguan qartë se elektorati kosovar është vetëdijësuar e sidomos është rinia ajo që mund të bëj kthesa të mëdha në shtetndërtim dhe t’i ndëshkojë subjektet që në vijimësi i terrorizuan me premtime boshe ku për pasojë gjatë fundvitit 2014 dhe fillimvitit 2015 mijëra kosovarë në mënyrë ilegale braktisën vendin në drejtim të vendeve perëndimore për një jetë më të mirë.
Njohësit e rrethanave politike rritjen e VV-së dhe ndëshkimin e PDK-LDK-së i shohin si diçka të pritur duke pasur parasysh se edhe sondazhet e vazhdueshme që janë bërë kanë treguar se elektorati dëshiron një qeverisje ndryshe dhe me njerëz të paprovuar në pushtetin qendror.
Politologu Mentor Tahiri, thotë se rezultatet e zgjedhjeve parlamentare, flasin për një emancipim politik më kualitativ në raport me vitet tjera.
Sipas tij qytetari dëshmoi se me votën e tij mund të dënojë ashpër hartuesit e politikave boshe dhe rrahagjoksit e famës e cila ka të bëjë me të kaluarën.
“Viktima më e madhe politike e këtyre zgjedhjeve është i nominuari për kryeministër i koalicionit PAN, Ramush Haradinaj, i cili që tani është jashtë loje, respektivisht çfarëdo kombinatorike për krijimin e qeverisë së re.
Vetëvendosje në anën tjetër, përkundër mosbesimit të madh që qytetarët kanë ndaj veprimeve dhe politikave të saj, sërish mbeti si opcioni i vetëm ku qytetarët e pakënaqur shprehën me votë pakënaqësinë e tyre me degradimin e përgjithshëm të jetës në Kosovë. Tani Vetëvendosje, përfundimisht ka evoluar në një parti politike. Madje matematikisht nëse lënë anash kamuflimin e partive tjera nën petkun e koalicioneve, Vetëvendosje paraqitet si forca më e madhe politike në vend”, thotë Tahiri, për tesheshi.com.
Sipas tij befasues për opinionin është pozicioni i LDK-së, e cila tani rradhitet si forca e tretë politike.
“Para LDK-së, pavarësisht pozicionimit të saj në raport me dy blloqet tjera politike, paraqitet një rrugë e gjatë e reflektimit, reformimit kuadrovik dhe ideologjiko-politik. LDK-në e kanë dëmtuar koalicionet me PDK-në në të kaluarën, por duhet pranuar se gjithashtu LDK ka humbur shumë nga identiteti i saj i dikurshëm”, shprehet Tahiri.
Faik Krasniqi, njohës i rrethanave politike thotë se rritja e Vetëvendosje-s, debakli i LDK-së dhe rënia drastike e PDK-së janë të pritshme.
“Vota për të dyja blloqet që tash e 18 vite kanë qenë në pushtet, ishte vetëm vazhdimësi e së keqes. Prandaj, qytetarët e Kosovës të ngopur me mashtrimet dhe premtimet e tyre boshe, ju treguan që nuk mund të talleni më me ne. Ky ishte sinjal i qartë që këto parti kanë keq-qeverisur dhe populli të ndëshkon”, thotë Krasniqi, për tesheshi.com.
Kujtojmë se 99.88 % të votave të numëruara nga Komisioni Qendror i Zgjedhjeve, PDK-AAK-NISMA është partia e parë fituese me 33.91 %, Vetëvendosje e dyta me 27.16 %, e treta LDK-AKR-Alternativa me 25.79 %, kurse Lista Serbe ka fituar 5.88 % të votave.
