Pasoja më e shpejtë e vendimit të KQZ-së janë zgjedhjet e Kavajës për kryetarin e ri të bashkisë, të cilat do të jenë edhe “nxemja”dhe “testi” final politik përpara 18 qershorit 2017.
Por veprimin e parë ligjor duhet ta bëjë Edi Rama. Protektori politik i Elvis Roshi do të duhet të firmosë shkarkimin e kreut të bashkisë së Kavajës.
Dhe menjëherë pas këtij vendimi, fjalën e ka Bujar Nishani i cili duhet të dekretojë zgjedhjet e reja në Kavajë, jo më vonë se 30 diitë pas shkarkimit. Që i bie në shkurt do të zhvillohen zgjedhjet në një nga zonat më të nxehta të vendit, por edhe më të rëndësishmet politikisht.
E nxehtë është Kavaja sepse ka qenë një bastion i së djathtës që kaloi majtas, por më e rëndësishmja pasi Lulzim Basha, me arritjen e kësaj fitorjeje politike, largimin e Roshit – do t’i duhet një fitore elektorale; dhe në Kavajë mund ta ketë mundësinë të ringrihet pasi elektoratin e vjetër e ka.
Ndërkaq, Kavaja është shumë e rëndësishme politikisht, pasi qarku i Tiranës do të nxjerrë 34 deputetë që janë rreth 1/3 e Parlamentit.
Duke u nisur nga fakti se Tiranëa tashmë dihet që voton PS-në dhe Kamza e Paskuqani PD-në, Kavaja do të jetë “serbratori” i votës për t’u sulmuar, sidomos nga Lulzim Basha, të cilit i duhet dëshpërimisht në mos një fitore, një ngritje e rëndësishme elektoralisht. Por nga ana tjetër, Elvis Roshi që e kundërshton procesin kundër tij do të jetë aktiv në mbështetje të kandidatit të majtë, ndërkohë që PD-ja ka aktivizuar një “elvisrosh” të djathtë që vjen nga fisi i njohur i Kazazëve.
Me një fjalë, Kavaja do të jetë “Torviolli” i politikës shqiptare ku nga kjo betejë do të varet shumë edhe shenja e 18 qershorit.
P.S. Torviolli, që sipas disa të dhënave ndodhet në Fushë-Bulqizë, ka qenë një beteje vendimtare mes Skënderbeut dhe Ballaban Bashës, dy renegatëve, njëri i Perandorisë Osmane dhe tjetri i Arbërit. Ishte më tepër një betejë taktike dhe padyshim prestigji. Historiografia shqiptare e servir si të fituar nga Skënderbeu, por burime më të pavurara i japin fitore Ballaban Pashës. /tesheshi.com/
