Nga Drilon Sylejmani
Iker Kasijas është një prej lojtarëve të pakët që kanë kaluar një jetë të tërë me një klub, duke fituar të gjithë trofetë e mundshëm sportivë.
Ai ishte vetëm 9 vjeç kur iu bashkua akademisë së Realit të Madridit dhe që nga ajo kohë nuk njeh asnjë ambient tjetër sportiv. Talenti që zotëronte ra menjëherë në sy, duke bërë lehtësisht diferencën mes bashkëmoshatarëve.
Për këtë arsye, u bë edhe pjesë e ekipit të parë që në moshën 18-vjeçare. Madje, debutoi në shtator të vitit 1999 në ndeshjen kundër Atletik Bilbaos. Dukej që ishte i përzgjedhuri. Askush nuk kishte guxuar më parë në Madrid që t’i besonte portën një adoleshenti, por Iker fitoi ndaj skeptikëve. U bë numri 1 i kuadratit të klubit më prestigjioz në botë, për ta ruajtur me heroizëm plot 16 sezone më radhë.
Idhulli i tifozëve, imazh i klubit, profesionist, dhe mbi të gjitha një person i dashur nga të gjithë kolegët. Së bashku me Ksavin, u cilësuan si shembujt perfektë për brezat e rinj. Jo vetëm për përkushtimin e tyre ndaj klubeve respektive, por edhe për miqësinë që kanë pasur, pavarësisht se ishin rivalë të zjarrtë në kampionat.
Ecuria me Kombëtaren e Spanjës ka qenë gjithashtu mbresëlënëse, duke fituar gjithashtu trofetë më të rëndësishëm. Një legjendë, por që duket se kjo nuk mjafton. Pas një jete në Madrid, Reali po e largon. Gjithsesi, kapiteni nuk i tradhton sërish tifozët e tij, duke zgjedhur një tjetër kampionat. Portugalinë! Një vend i bukur për të jetuar dhe për një klub si Porto, ku do ndihet sërish i respektuar…
Trofetë e fituar në karrierë
5 tituj kampion i Spanjës
2 Kupa të Mbretit
4 Superkupa të Spanjës
3 Liga Kampionesh
2 Superkupa Europiane
1 Kupë Interkontinentale
1 Botëror për Klube
2 Kampionë Europe
1 Kupë të Botës
5 herë portieri më i mirë në botë /teshesh.com/
