PDIU, aleate në qeveri me PS-në, ka refuzuar të votojë ministrat e rinj. Burime për tesheshi.com thanë se kjo parti do të dalë së një deklaratë për shtyp ku do të paraqesë disa propozimeve për zgjidhjen e krizës duke u vetofruar si negociatore për zgjidhjen e krizës mazhorancë-opozitë për zgjedhjet e reja.
Mësohet se Idrizi do t’i propozojë Ramës disa zgjidhje që kanë të bëjnë me besueshmërinë tek procesi zgjedhor dhe që sipas tij kënaqin dhe opozitën.
Së pari, PDIU do të propozojë një reformim tërësor të Policisë së Shtetit duke kërkuar largimin e drejtorit të përgjithshëm dhe gjithë drejtorëve rajonalë në prag të zgjedhjeve. Pas largimit të ministrit të Rendit, Saimir Tahiri, ministri më i akuzuar nga opozita, një reformë e tillë do të krijonte qetësi tek opozita se policia nuk do të kishte ndikim tek zgjedhjet e reja.
Së dyti, Idrizi do të propozojë numërim elektronik të votave, një kërkesë kjo që shkon sërish me kushtet e vendosura nga opozita dhe krijon më shumë besueshmëri në procesin e zgjedhjeve. Votimi të jetë tradicional por numërimi të bëhet me pajisje të posaçme që skanojnë çdo votë dhe nxjerrin rezultatet në kohë rekord.
Së treti, PDIU pritet të propozojë ngritjen e një strukture të posaçme pranë KQZ-së që të merret me ankesat për manipulim të votës apo blerje dhe shitje të votës duke qenë e autorizuar që të japë vendime në kohë rekord pa e zgjatur procesin.
Së katërti, kjo parti propozon zgjerimin e KZAQZ-ve me anëtarë nga të gjitha partitë parlamentare, si dhe rritjen e rëndësisë së rolit të vëzhguesve të partive joparlamentare në proces.
Paketa e propozimeve pritet të bëhet e ditur gjatë ditës së sotme dhe kështu parti e njohur si partia e çamëve do të tentojë të pajtojë “gjakrat” mes palëve me zgjidhje konkrete. Nuk dihet nëse Idrizi ka marrë ndonjë sinjal nga opozita për këtë lëvizje të radhës, por lëvizja e tij për të mos votuar ministrat ishte suprizë dhe aspak e pëlqyeshme për Edi Ramën i cili mbështetej në votat e aleatit të ri pasi të pasigurta kishte votat e LSI-së. /tesheshi.com/
