Janë identifikuar dyzet e gjashtë viktima të gjenocidit të Srebrenicës, masakrës më të madhe në Europë që nga Lufta e Dytë Botërore, dhe do të varrosen në përvjetorin e njëzetë të mizorisë, ka bërë me dije Instituti për Personat e Humbur i Bosnjë-Hercegovinës.
Zëdhënësja e institutit, Lejla Çengiç, pohoi se viktimat ishin gjetur në varre masive. Ajo tha se janë identifikuar zyrtarisht dyzet e gjashtë trupa, familjet e të cilave kanë deklaruar se dëshirojnë që eshtrat të varrosen në 11 korrik të këtij viti.
Zëdhënësja shtoi se ndonëse në varret masive janë zbuluar 160 viktima dhe janë identifikuar zyrtarisht, pjesa më e madhe e familjeve duan të presin përpara se të mund të varrosen, teksa shumë prej trupave ishin ende të paplotë.
Mbi 8.000 muslimanë boshnjakë u vranë pasi ushtria serbo-boshnjake sulmoi “zonën e sigurt” të Kombeve të Bashkuara në Srebrenicë në korrikun e vitit 1995, me gjithë praninë e trupave paqeruajtëse holandeze.
Qindra familje boshnjake vazhdojnë të jenë që prej mbarimit të konfliktit në kërkim të njerëzve të humbur mes civilëve të vrarë dhe të hedhur në varre masive.
Sipas Institutit për Personat e Humbur në Bosnjë-Hercegovinë, një numër i përgjithshëm prej 8.400 njerëzish mbeten të humbur pas luftës së Bosnjës të viteve 1992-1995. /tesheshi.com/
