Forca të armatosura rëndë dhe me artileri dhe helikopterë po mitralojnë Kumanovën ndërkohë ka një terr informative në lidhje me viktimat dhe të lënduarit. Siç mësohet autoblinda të shumta te armatosura edhe me Gulinov janë në thellësi të Lagjes së Trimave në Kumanovë, ndërkohë dëgjohen edhe të shtëna sporadike kallashnikovi.
Disa familje të kësaj lagje kanë arritur që të evakuohen nga shtëpitë e tyre dhe se bëjnë të ditur për dëme të mëdha të pësuara. Ata theksojnë se plumbat kanë vërshuar në tërë lagjen dhe se ka të shtëna në një distancë të vogël.
Zëdhënësi i Ministrisë për Punë të Brendshme Ivo Kotevski në pres konferencën e orës 14:00 ka njoftuar për aksionin policor në “Lagjen e Trimave” në Kumanovë, por pa mos shpalosur detaje, nën arsyetimin se aksioni është në rrjedhë e sipër.
Sipas Kotevskit MPB ka arritur ta targetoj “grupin terrorist”, të cilët i kanë rezistuar aksionit policor me arsenal ushtarak.
“Aktivitetet në teren po vijojnë, policia taktikisht ka avancuar, apelojmë qytetarët të qëndrojnë qetë”, deklaroi zëdhënësi i MPB-së Ivo Kotevski.
Identiteti i një viktime
Sipas “Al Jazeera Balkans”, shqiptari i vrarë është Fadil Fejzullahi nga “Lagja e Trimave” të Kumanovës ku janë zhvilluar luftimet në mëngjesin e sotëm. Ky televizion ka bërë të ditur se emri i personit të vrarë është njoftuar nga banorë lokal. Banorët e Kumanovës flasin për disa persona civil shqiptarë të vrarë, por ende nuk ka asgjë zyrtare se sa persona dhe kush janë të vrarët.
Paraprakisht, mediat në Maqedoni njoftuan se janë vrarë pesë persona, në mesin e të cilëve ka edhe një vajzë 8 vjeçare. Media të tjera raportojnë se kanë informacione për vrasjen e dy grave dhe dy fëmijëve të tjerë. Megjithatë, asgjë nuk është zyrtare.
Ngjarja e mëngjesit
Të shtëna të shumta kanë tmerruar për rreth dy orë banorët e Kumanovës, në Maqedoni, mëngjesin e së shtunës. Krismat me armë zjarri dhe helikopterët që kanë fluturuar mbi qytet kanë krijuar një atmosferë lufte.
Sipas informacioneve të para, bëhet fjalë për një përleshje të armatosur që ka nisur rreth orës 5 të mëngjesit mes focave të policisë maqedonase dhe një grupi të armatosur. Përleshja është zhvilluar në “Lagjen e Trimave”, të banuar me shqiptarë, që ndodhet rreth 700 metra nga qendra e qytetit.
Zëdhënësi i Ministrisë së Brendshme, Ivo Kotevski, tha se policia ka ndërmarrë një aksion pas informacioneve për lëvizje të një grupi të armatosur në atë pjesë të Kumanovës. Në këtë lokalitet janë stacionuar forca të shumta të policisë, që kanë bllokuar rrugët drejt lagjes ku ka ndodhur përleshja. Autoritetet zyrtare nuk japin asnjë informacion mbi ngjarjen. Jozyrtarisht flitet për 15 të plagosur, mes të cilëve agjentë të policisë, si dhe për 5 policë të vrarë. Por lajmet janë të pamundura të konfirmohen.
Ndërkohë, banorë shqiptarë në Lagjen e Trimave kanë lënë shtëpitë e tyre dhe kanë filluar të zhvendosen në lagje të tjera. Ata kanë thënë nuk e kanë të qartë se cilët janë personat që janë përleshur me policinë.
