Kur NASA njoftoi se po kërkon një oficer për mbrojtjen planetare, ata po prisnin aplikime nga shkencëtarët më të mirë të botës për këtë pozicion.
Por një djalë nëntë vjeç, “kujdestar i vetëshpallur i galaktikës”, vendosi të aplikojë për këtë vend pune duke dërguar në NASA një letër shumë interesante aplikimi, shkruan The Sun.
Djali i ri, i quajtur Jack Davis, i dërgoi agjencisë hapësinore amerikane një letër të shkruar me dorë për të aplikuar për këtë rol, që përfshinte parandalimin e “ndotjes biologjike gjatë eksplorimit njerëzor dhe robotik të hapësirës”.
Ai i tha NASA-s, se do të ishte i përkryer për këtë punë, sepse motra e tij gjithmonë i thotë atij se “ai është si një alien dhe se ai është i obsesionuar me filmat shkencorë”.
Jack, i cili është në klasën e katërt në shkollën fillore, shkroi: “unë mund të jem nëntë vjeçar, por besoj se do të isha kompetent për këtë punë.
Unë gjithashtu kam parw filmin ‘Agents of SHIELD’ dhe shpresoj që të shoh edhe filmin ‘Men In Black’.
Unë jam shumë i mirë edhe në video lojëra. Po ashtu jam i ri, kështu që unë mund të mësoj të mendoj si një alien”.
Dhe padyshim letra e Jack shkriu zemrat e atyre që punonin në NASA, pasi Dr James L. Green, drejtor i divizionit të shkencës planetare, i ktheu një përgjigje të ngrohtë.
Ai shkroi duke i thënë Jack-ut se ai ishte i lumtur kur dëgjoi se ishte “kujdestar i galaksisë” dhe i dha atij disa këshilla për t’iu bashkangjitur NASA-s në të ardhmen.
Dr Green shtoi “ne jemi gjithmonë në kërkim të shkencëtarëve dhe inxhinierëve të ardhshëm që do të na ndihmojnë, kështu që shpresoj se do të studioni shumë dhe do të arrini suksese të shkëlqyeshme në shkollë”. /tesheshi.com/
