Pas publikimit në rrjetet sociale të bisedave të nxehta nga gazetari maqedonas, Zoran Bozhinovski ku dëgjohen funksionarë të lartë të BDI-së në biseda me karakter erotik nëpërmjet telefonit, së fundi ka reaguar edhe ish-deputeti dhe n/kryetari i Kuvendit, Hysni Shaqiri.
Ai, në një deklaratë për gazetën Lajm ka bërë të ditur se në vitin 2004 e kishte paralajmëruar kreun e BDI-së, Ali Ahmetin se selia e BDI-së po bëhet shtëpi publike.
“Nuk jam i habitur nga incizimet e publikuara. Ju betohem se në vitin 2004, Ali Ahmetit, në zyrën e tij i kam thënë se të punësuarit po ankohen që selia e partisë është bë shtëpi publike. E kam paralajmëruar për këtë gjë. Çdo ditë të punësuarit ankoheshin te unë nga amoraliteti që e vërenin nëpër zyra”, thotë ish-deputeti Shaqiri.
Ai shton se Ahmeti asnjëherë nuk i ka marrë seriozisht këto paralajmërime, andaj sot janë ku janë.
“Ahmeti arsyetohej se nuk di asgjë dhe se do të interesohet nëse këto pohime janë të vërteta. Mirëpo ja që po shihet se nuk ka ndërmarrë asgjë”, thotë Shaqiri i cili lëshoi BDI-në në vitin 2004, ndërkohë që ishte n-kryetar i Kuvendit. Ai nuk përjashton mundësinë që në të ardhmen të publikohen biseda të ngjashme edhe për funksionarë tjerë të lartë.
Shaqiri është deputeti i vetëm shqiptarë në Maqedoni që ka lëshuar tri parti politike, ndërkohë që ato kanë qenë në pushtet. M.Krasniqi – /tesheshi.com/
